АҚШ давлат котиби Энтони Блинкен Исроил стратегик ишлар вазири Рон Дермер билан Ғазодаги гуманитар вазиятни муҳокама қилди, дея хабар беради АҚШ Давлат департаменти.
“Блинкен Ғазодаги оғир гуманитар вазиятни муҳокама қилди, вазиятни яхшилаш бўйича кўрилган чоралар билан танишди ва тинч аҳолига ёрдамни оширишга чақирди”, дейилади Давлат департаменти баёнотида.
АҚШ давлат котиби ва Исроил вазири, шунингдек, минтақадаги кескинликни пасайтириш учун зарур қадамларни муҳокама қилди.
“Давлат котиби Ғазодаги урушни тўхтатиш ва барча гаровга олинганларни уйларига қайтариш, шунингдек, урушдан кейин кўриладиган чораларни аниқлаш муҳимлигини таъкидлади”, дейилади ТИВ хабарида.
Ҳар икки амалдор “Ливанда дипломатик ечимга эришиш учун давом этаётган саъй-ҳаракатлар” мавзусига ҳам тўхталди.
Блинкен Эрондан келаётган таҳдидлар фонида АҚШнинг Исроил хавфсизлиги бўйича зарурий чоралар кўришга тайёрлигини яна бир бор таъкидлади.
13 октябрь куни Энтони Блинкен ва Пентагон раҳбари Ллойд Остин Исроил ҳукуматига мактуб йўллаб, унда Исроил Америка қуролларини олишда давом этишни истаса, Ғазо секторидаги гуманитар вазиятни бир ой ичида яхшилаши зарурлигини талаб қилганди.
Изоҳ (0)