Хитой Мудофаа вазирлиги расмий вакили У Сян АҚШнинг Typhon ўрта масофали ракета тизимини Филиппиндан дарҳол олиб чиқишга чақирди. Бу ҳақда Xinhua хабар берди.
Сян шу тариқа Филиппин мазкур ракета тизимини харид қилиш имкониятини кўриб чиқаётгани ҳақидаги хабарларга муносабат билдирди. У бунга бир неча бор қатъий норозилик билдирилганини эслатди.
Typhonни “ҳужум қуроли” деб атаган Сян, Филиппиннинг Америка ракеталарини жойлаштиришга розилиги бевосита геосиёсий қарама-қаршиликни келтириб чиқариши ва минтақадаги вазиятни кескинлаштиришини таъкидлади.
Хитой расмийси бу Филиппиннинг шахсий иши эмаслиги, чунки бу минтақанинг барча мамлакатлари хавфсизлигига дахлдорлигини айтди.
Тарих ва воқелик Америка қуроллари жойлаштирилган жойларда низолар хавфи ошиб бораётганини кўп марта исботлаган. Биз тегишли томонларни Typhon ўрта масофали ракета комплексини дарҳол олиб чиқишга чақирамиз, деди Сян.
У, агар АҚШ ва Филиппин оқибатларни ҳисобга олмасдан ҳаракат қилишда давом этса, Хитой томони қатъий жавоб чораларини кўришини айтди.
Хитой нишонларига зарба бериш қобилиятига эга Typhon тизими 2024 йилнинг бошида қўшма машғулотлар учун олиб келинганди. Хитой ва Россия тизимнинг илк бор Ҳинд-Тинч океанига жойлаштирилишини қоралаб, Вашингтонни қуролланиш пойгасини авж олдиришда айблаган.
Изоҳ (0)