Агар Исроил урушдан зарар кўрган Ғазо секторидаги гуманитар вазиятини яхшилаш учун чоралар кўрмаса ва 30 кун ичида анклавга гуманитар ёрдам етказиб берилишини таъминламаса, АҚШ ҳарбий кўмакни қисқартириши мумкин. Бу ҳақда Axios хабар берди.
13 октябрь куни Исроил мудофаа вазири Йоав Галантга юборилган мактубда АҚШ давлат котиби Энтони Блинкен ва Пентагон раҳбари Ллойд Остин аниқ чоралар кўришга ва Ғазога келаётган ёрдамни аввалги даражагача оширишни таъминлашга чақирган.
Сентябрь ойида Ғазога юборилган ёрдам ҳажми бутун ўтган йил давомида энг паст кўрсаткичга етди. Гуманитар вазиятни яхшилаш учун Исроил бугундан бошлаб ва 30 кун ичида аниқ чоралар кўриши керак, дейилади мактубда.
Унда, шунингдек, Америка ёрдамини етказиб беришга тўсқинлик қилаётган мамлакатларга ҳарбий ёрдам кўрсатишни тақиқловчи АҚШ қонунлари ҳам санаб ўтилган. Давлат департаменти мактубнинг махфий хусусиятга эга эканини таъкидлади.
Шунингдек, Исроил кунига камида 350 та гуманитар ёрдам ортилган юк машинасини ўтказишга, Ғазога бешинчи ўтиш йўлини очишга ва фавқулодда зарурат бўлмаганда фаластинликларни кўчиришга буйруқ бермасликка чақирилган.
Исроил расмийси Axios’га “мактуб қабул қилинган ва Исроил хавфсизлик ходимлари томонидан диққат билан кўриб чиқилмоқда”, деди.
Исроил бу масалага жиддий қарайди ва ушбу мактубда билдирилган хавотирларни америкалик ҳамкорлар билан муҳокама қилиш ниятида, деди у.
Изоҳ (0)