Украинага берилган F-16 қирувчи самолётлари Америкада ишлаб чиқарилган ракеталар билан жиҳозланади, деб ёзади The Wall Street Journal (WSJ) манбаларга таяниб.
Нашр маълумотларига кўра, F-16 ни АGM-88 HARM “ҳаво-ер” ракеталари ва AMRAAM ўрта масофага мўлжалланган “ҳаво-ҳаво” ракеталари ҳамда АИМ-9Х қисқа масофали ракеталари билан жиҳозлаш режалаштирилган.
F-16 учун ракеталарни етказиб бериш доирасида Қўшма Штатлар узоқ масофага зарба йўллашга мўлжалланган қурилмалар учун ҳам ўқ-дориларни топширишни режалаштирмоқда.
“Биз буларнинг барчасини ҳеч бўлмаганда уларга керак бўлган муҳим ҳажмларда етказиб бера олишимизга ишончимиз комил”, деди исмини ошкор этмаган АҚШ расмийси WSJ’га.
Нашр манбасининг қайд этишича, кўплаб Европа давлатлари ўз захираларидан Украинага катта ҳажмдаги ўқ-дориларни жўнатишни истамаган. Шу сабабли АҚШ Мудофаа вазирлиги Европа давлатлари ўз молиявий маблағларини бирлаштириб, Украина учун қуролларни сотиб олишлари мумкин бўлган режа ишлаб чиқди.
Олдиндан эълон қилинган режаларга кўра, Дания, Нидерландия, Норвегия ва Бельгия Украина учун F-16 самолётларини беради. Умуман олганда, Украина қуролли кучлари 80 га яқин қирувчиларни қабул қилади, етказиб беришнинг бир қисми йил охиригача амалга оширилади. 10 июль куни АҚШ давлат котиби Энтони Блинкен Дания ва Нидерландия аллақачон F-16 самолётларини етказиб беришни бошлаганини айтганди.
Изоҳ (0)