Сербия ўз армиясини кучайтириши ва ядровий уруш хавфи туфайли бомбапаноҳлар тайёрлаши керак. Бу ҳақда мамлакат президенти Александр Вучич хабар берди.
Айни пайтда мутлақо тайёр эмасмиз, бомбапаноҳларимизда 257 минг ўрин бор. Биз бошпана сифатида 1,5 миллион кишини жойлаштириш учун инфратузилмани тиклашимиз керак, деди у.
Сиёсатчига кўра, Белград 2011-2012 йилларда бомбапаноҳлар ҳолатини яхшилаш учун бюджетдан маблағ ажратишни тўхтатган.
Ўшандан бери улар ёмон аҳволга тушиб қолган, биз эса ушбу вазиятгача бунга эътибор қаратмаган эдик, бу ҳам ўз навбатида хатолик бўлди. Энди буни тизимли равишда тўғрилашимиз керак, деди президент.
Украина ва Россия ўртасидаги можарони муҳокама қилар экан, у Сербия ўз позициясига содиқ қолишини таъкидлади. Бироқ глобал уруш хавфи ҳеч қачон бугунгидек катта бўлмаганини айтди.
Ҳар қандай томоннинг баёноти, камида, вазиятни юмшатишга ёрдам бермайди. Бу янада кўпроқ можаролар, муаммолар ва биз қочишга ҳаракат қилаётган нарса — кенг кўламли урушга олиб келишидан хавотирдаман, деди Вучич.
19 ноябрь куни Россия президенти Владимир Путин Россиянинг янги ядровий доктринасини тасдиқлади. Ҳужжатга кўра, Москва дронлар, қанотли ракеталар ҳужумларига ёки ўз ҳудудининг бир қисмини йўқотиш таҳдидига жавобан ядро қуролидан фойдаланиш ҳуқуқини ўзида сақлаб қолади.
Бу ўзгаришлар Ғарбда реакция уйғотди. АҚШ Стратегик қўмондонлигидан контр-адмирал Томас Бюкенен Америка ядровий зарбалар алмашишга тайёрлигини айтди. Пентагон раҳбарининг ядро сиёсати бўйича ёрдамчиси ўринбосари Ричард Жонсонга кўра, АҚШ ўз ядровий салоҳиятини ошириш ва модернизация қилишда давом этади.
Франция ташқи ишлар вазири Жан-Ноэл Барро Россия доктринасига изоҳ берар экан, Париж Путиннинг ядровий таҳдидларидан қўрқмаслигини таъкидлади. У Ғарб икки йилдан ортиқ вақтдан бери Москва НАТОга босим ўтказишда фойдаланаётган бундай шантажларга кўникканини билдирди.
Изоҳ (0)