Буюк Британия Украинага Россия ҳудудига ҳужум қилиш учун Storm Shadow қанотли ракеталаридан фойдаланишга рухсат беришга қарор қилди. Бу ҳақда The Guardian нашри Британия ҳукуматидаги манбаларига таяниб хабар берди.
![](/static/2024/09/12/photo_2024-09-12_16-34-57-ovlOTcdl.jpg)
Бу ҳақда нашр АҚШ давлат котиби Энтони Блинкен ва Буюк Британия ташқи ишлар вазири Девид Леммининг 11 сентябрь куни Киевга қўшма ташрифига бағишланган мақоласида айтиб ўтган. Сафар чоғида улар Украина президенти Владимир Зеленский билан учрашиб, Ғарбнинг узоқ масофага мўлжалланган қуролларининг Россия ҳудудига зарбаларини муҳокама қилишган.
Газета манбаларининг таъкидлашича, Блинкен ва Лемми Киевга Storm Shadow бўйича ижобий қарор қабул қилингани учун бирга келган. Шу билан бирга, агар Лемми қарорни Киевда омма олдида эълон қилганида, унинг сўзлари керакциз провокация сифатида қабул қилиниши мумкин эди.
Нашрнинг қўшимча қилишича, Украинанинг ракеталардан фойдаланишида “ўйламасдан ёки керакциз ҳужумларнинг олдини олиш учун” чекловлар ўрнатилади. Блинкен Қўшма Штатлар биринчи кунданоқ Украинадаги жанг майдонидаги вазиятга қараб ўз сиёсатини мослаштиришга тайёр бўлганини маълум қилган.
“Блинкен Киевнинг урушда қандай мақсадлари борлиги ва уларга эришиш учун Вашингтон нима қилиши мумкинлиги ҳақида Зеленский ҳамда бошқа украиналик расмийлардан бевосита эшитишни истаётганини айтди”, деб ёзади Reuters.
Учрашувдан сўнг Зеленский Блинкен ва Лемми билан “жуда мазмунли ва узоқ суҳбат” ўтказганини айтган.
“Барча асосий масалалар муҳокама қилинди, бу узоқ масофали қуроллар, фронтда жанговар бригадалар билан таъминлаш ва адолатли тунчликни яқинлаштириш бўйича умумий стратегияга тааллуқлидир”, деди Зеленский.
Украина президенти билан учрашувдан сўнг Блинкен Киевнинг позициясини АҚШ президенти Жо Байденга, Лемми эса Буюк Британия бош вазири Кей Стармерга баён этишга ваъда берган.
13 сентябрь куни Вашингтонда АҚШ ва Буюк Британия раҳбарлари учрашади. The Guardian нашрининг ёзишича, ушбу учрашув натижасида улар Лондон Украинага Россияга зарба бериш учун Storm Shadow’дан фойдаланишга рухсат берганини очиқ эълон қилмасликлари кутилмоқда.
Изоҳ (0)