Ливан Исроил билан 60 кунлик сулҳ доирасида 2022 йил октябрь ойидан бери бўш турган давлат раҳбари лавозимига президент сайлаши керак. Бу ҳақда Ливан разведка хизматларидаги манбаларга таяниб, Тhe National нашри хабар берди.
“Келишувга олиб келган музокаралар давомида воситачилар билан 60 кунлик сулҳ давомида Ливан ниҳоят президентни сайлаши кераклиги келишиб олинди”, деди нашрга Ливан хавфсизлик хизматининг юқори лавозимли амалдори.
Депутатлар палатаси спикери Набиҳ Берри “оташкесимдан сўнг дарҳол республика президентини сайлаш бўйича йиғилиш санасини белгилашини” таъкидлаган. Спикерга кўра, кенгаш 9 январга белгиланиши режалаштирилмоқда.
Ливанда президентлик лавозими 2022 йил 31 октябрдан бери генерал Мишел Аун олти йиллик ваколат муддати тугагач, Баабда президентлик саройини тарк этганидан сўнг бўш қолган.
Жорий йилнинг 14 июнь куни парламент аъзолари республика раҳбарини сайлаш учун 12 марта уринишди. Бироқ номзодларнинг ҳеч бири ғалаба қозониш учун зарур бўлган —128 тадан 65 та овоз тўплай олмаган.
1943 йилда насронийлар ва мусулмонлар ўртасида қабул қилинган Ливан ҳукуматининг конфессиявий тамойиллари тўғрисидаги миллий пактга кўра, мароний насроний мамлакат президенти, сунний мусулмон бош вазир, шиа мусулмон эса парламент раиси этиб сайланиши керак. Президент йўқлигида давлат ҳокимияти бош вазир ва унинг кабинети бошқарувида бўлади. Бироқ Нажиб Микатий муваққат ҳукумати чекланган ваколатларга эга бўлиб, Ливандаги сиёсий ва иқтисодий тангликни янада кучайтирмоқда.
Исроил ва Ливан ўртасида 2023 йил октябрь ойида ҳарбий ҳаракатлар бошланганидан бери биринчи сулҳ келишуви 27 ноябрь куни эрталаб кучга кирди.
Сулҳ мазмуни
Сулҳ Ливандаги БМТ муваққат кучлари кўмагида Ливан армиясининг жанубий чегара бўйлаб участкаларни босқичма-босқич назорат қилишни назарда тутади. Ўз навбатида, Исроил икки ой ичида Ливандан ўз ҳарбийларини олиб чиқиши шарт. “Ҳизбуллоҳ” БМТ Хавфсизлик кенгашининг 1701-резолюциясига мувофиқ Ливаннинг жанубидаги иштирокини тўхтатиб, Литани дарёсининг шимолидан чекиниши керак бўлади.
26 ноябрь куни Исроил ҳарбий-сиёсий маҳкамаси бош вазир Биньямин Нетаньяху томонидан тузилган “Ҳизбуллоҳ” билан ўт очишни тўхтатиш режасини тасдиқлади. АҚШ президенти Жо Байден келишув Вашингтон ташаббуси билан эришилганини айтди.
Келишув, шунингдек, Исроил армиясининг маҳаллий фуқароларга “хавфсизлик учун” чегара бўйлаб эвакуация қилинган шаҳар ва қишлоқларга бормаслик ҳақидаги расмий кўрсатмаларига зид равишда содир бўлди.
Ливандаги кўчирилган аҳолининг оптимизми асосан маҳаллий сиёсатчилар томонидан рағбатлантирилди. Тинчлик музокараларида “Ҳизбуллоҳ” номидан қатнашган парламент спикери Набиҳ Берри фуқароларни жанубий ҳудудларга, “ўз юртларига” қайтишга чақирди.
Исроил мудофаа вазири Исроил Кацнинг таъкидлашича, ҳарбийлар имкон қадар қаттиққўл ҳаракат қилиш, хусусан, “санитария зонаси”ни бузганлар хавф туғдириши мумкин бўлган тақдирда уларни отиб ўлдириш ҳуқуқига эга.
Фаластиннинг ҲАМАС ҳаракати вакиллари ҳам ушбу хабарга ижобий муносабат билдирди.
“Умид қиламизки, бу келишув Ғазода халқимизга қарши қирғин урушини тугатишга олиб келадиган келишувга эришиш учун йўл очади”, деди ҳаракат вакили Сами Абу Зуҳрий.
ҲАМАС Ғазода ўт очишни тўхтатиш бўйича ҳаракатларга очиқлигини тасдиқлади. Ҳаракатнинг исмини ошкор этмаган вакили Исроилни келишувга тўсқинлик қилишда айблади.
Изоҳ (0)