Президент Шавкат Мирзиёев 22 ноябрь куни иқтисодий тараққиёт, самарали бошқарув ва халқаро ҳамкорлик масалалари бўйича маслаҳатчи Сума Чакрабарти билан учрашув ўтказди. Бу ҳақда Президент матбуот хизмати хабар берди.
“Ўзбекистон - 2030” стратегиясини жорий йилги давлат дастури доирасида амалга оширишнинг ҳолати ҳамда келгуси йилда ислоҳотларни янада илгари суриш истиқболлари кўриб чиқилди.
Давлат бошқарувида кадрларни тайёрлаш ва уларнинг малакасини ошириш масалаларига алоҳида эътибор қаратилди.
Учрашувда Ўзбекистоннинг Жаҳон савдо ташкилотига аъзо бўлиш жараёни доирасидаги кейинги қадамлар муҳокама қилинди. Миллий қонунчиликни ЖСТ қоидалари ва талаблари билан уйғунлаштиришни жадаллаштириш, шунингдек, мамлакатнинг глобал рейтинглардаги ўрнини яхшилаш бўйича ишларни давом эттириш зарурлиги қайд этилди.
Президент режалаштирилган барча лойиҳаларни ўз вақтида амалга ошириш, стратегик ислоҳотлар кун тартибини янги ташаббуслар билан, айниқса мамлакатимизда эълон қилинган Атроф-муҳитни муҳофаза қилиш ва “яшил” иқтисодиёт йилидаги вазифаларни ҳисобга олиб янада бойитиш муҳимлигини таъкидлади.
Ўзбекистон нима учун ЖСТга аъзо бўлиши керак?
Ўзбекистоннинг ЖСТга аъзо бўлиши бўйича ишчи гуруҳ 1998 йилда ташкил этилган эди. Кейинги йилларда ушбу ишчи гуруҳ фақат уч марта учрашди ва 2005 йилларнинг ўрталарига келиб бу борада халқаро экспертлар билан учрашувлар тўхтаб қолганди.
2018 йили мустақил эксперт, ЖСТ масалалари бўйича ҳуқуқшунос Умида Ҳақназар Ўзбекистон жаҳон савдо ташкилотига кириши хусусида фикр билдирган эди.
“Жаҳон савдо ташкилотига аъзо бўлиш ҳам бу борада муҳим аҳамият касб этиб, ишлаб чиқаришни ривожлантиришда, экспортни ўстириш ва кенгайтиришда, бозор ислоҳотларини давом эттириш барқарорлигини таъминлашда ёрдам бериши мумкин. Техник тартибга солиш, божхона маъмуриятчилиги, хизмат соҳасидаги қонунчилик бўйича институционал ислоҳотлар ишлаб чиқариш, илмий-техник ривожланишнинг дунё миқёсидаги жараёнига интеграциялашув имкониятини тезлаштиради ва осонлаштиради. Бу ишбилармонлик ва рақобат муҳитининг янада яхшиланишига олиб келади. ЖСТга аъзо бўлиш алоҳида корхоналарга берилган ҳаммага бир хил бўлмаган имтиёз ва тартибларни бекор қилишни, коррупция даражасини камайтиришни англатади. Хусусий сектор ҳаққоний қоидалар бўйича ривожланади”, деган эди у.
Ўзбекистоннинг ЖСТга аъзо бўлиш жараёни 2020 йил июль ойида бўлиб ўтган ишчи гуруҳнинг тўртинчи йиғилиши билан расман қайта тикланди. Шундан сўнг 2022 йил июнь, 2023 йил март ва 2023 йил ноябрь ойларида яна учта учрашув бўлиб ўтди.
2023 йил сентябрида Шавкат Мирзиёев БМТ Бош ассамблеясининг 78-сессияси доирасида Жаҳон савдо ташкилоти (ЖСТ) бош директори Нгози Оконжо-Ивеала билан учрашув ўтказганди. Унда ЖСТ бош директори Ўзбекистон томонидан ташкилотга аъзо бўлиш борасида кўрилаётган чораларни юқори баҳолаган. Нгози Оконжо-Ивеала ЖСТ котибияти Ўзбекистоннинг саъй-ҳаракатларини тўлиқ қўллаб-қувватлашини айтган ҳамда мамлакат яқин келажакда ташкилотга қўшилишига ишонч билдирганди.
2024 йилнинг февралида Ўзбекистонда 5 та қонун ЖСТ битимларига уйғунлаштирилиши айтилган эди. Май ойи охирида Ўзбекистоннинг ЖСТга аъзо бўлиши юзасидан ишчи гуруҳнинг Женевада бўлиб ўтган саккизинчи йиғилишида мамлакатнинг ушбу ташкилотга қўшилиш учун зарур ислоҳотларни амалга ошириш борасидаги саъй-ҳаракатлари юқори баҳолаганди.
Шавкат Мирзиёев 5 июнь куни Жаҳон савдо ташкилоти бош директори доктор Нгози Оконжо-Ивеалани қабул қилган эди. Унда ЖСТнинг кўмаги билан Ўзбекистонда Савдо сиёсати бўйича компетенсия марказини ташкил этиш таклиф этилган.
Шу куни Президент ёрдамчиси Саида Мирзиёева “Ўзбекистондаги иқтисодий ислоҳотлар ва Жаҳон савдо ташкилотига аъзо бўлиш жараёни” конференцияси доирасида ЖСТ бош директори Нгози Оконжо-Ивеала билан учрашганди. Суҳбат чоғида Ўзбекистоннинг ЖСТга қўшилиши давлат раҳбари учун ўта муҳим устувор масала эканига алоҳида эътибор қаратилган.
ЖСТнинг еттинчи бош директори Нгози Оконжо-Ивеала ташкилотга аъзолик ҳақида қуйидаги фикрларни билдириб ўтган эди:
ЖСТга аъзо бўлишнинг кўплаб афзалликлари бор. Мамлакат қилиши керак бўлган нарса – бор имкониятлардан фойдаланиш. Ташкилот аъзолари дунё савдосининг 98 фоизини қамраб олади ва сиз унга аъзо бўлиш орқали бошқалар билан ишлаш имкониятига эга бўласиз. ЖСТга аъзолик Ўзбекистон ишлаб чиқарувчиларига жаҳон бозорига чиқиб, рақобатбардошликни ошириш имкониятларини беради. Ташкилотга аъзо бўлган мамлакатлар юқорироқ иқтисодий ўсиш суръатларини кўрсатмоқда.
Сўнгги ўн йилликларда ЖСТга қўшилган мамлакатларда иқтисодий ўсиш кузатилмоқда. 2024 йил май ойида Женевада ЖСТ аъзоларини қизиқтирган асосий масалалар бўйича муваффақиятли музокаралар ўтказилди.
5 июнь куни Жаҳон савдо ташкилоти, Жаҳон банки ва Халқаро валюта жамғармаси кўмагида ўтказилган юқори даражадаги конференция президент ёрдамчиси Ўзбекистоннинг ЖСТга қўшилиш йўлидаги шаҳдам қадамлари яна бир бор намоён бўлганини қайд этди.
Президентнинг ЖСТ бўйича махсус вакили Азизбек Урунов Ўзбекистоннинг ЖСТга аъзо бўлиши бўйича ишчи гуруҳнинг 9-йиғилиши 2024 йилнинг 5-6 декабрь кунлари Женева шаҳрида бўлиб ўтишини маълум қилди.
Изоҳ (0)