Коррупцияга қарши курашиш агентлиги давлат хизматчиларининг тадбиркорлик фаолияти билан шуғулланиб келаётганлиги ҳолатлари юзасидан маълумот эълон қилди.
Агентлик томонидан ўтказган текширувларга кўра, Ўзбекистонда жами 1378 нафар давлат хизматчилари (138 нафари ҳоким ва ҳоким ўринбосарлари, 148 нафари давлат банклари бошқарувчиси ва уларнинг ўринбосарлари, 1092 нафари ҳоким ёрдамчилари) давлат хизмати билан бирга (раҳбар ёки таъсисчи сифатида) тадбиркорлик фаолияти билан шуғулланиб келаётгани аниқланган.
Шунингдек, давлат харидлари соҳасида ўтказилган ўрганишларда ҳудудларда давлат ташкилотларининг мансабдор шахслари ва уларнинг яқин қариндошларига тегишли корхоналар давлат харидларида иштирок этиб, ғолиб бўлгани аниқланган.
Хусусан, Пискент тумани ҳокими Раҳимжон Рихсиев 2022 йил 6 сентябрь куни E-аукцион платформаси орқали ўтказилган савдоларда Тошкент вилояти Оҳангарон тумани Марказий қўрғон маҳалласи ҳудудидаги 397,9 гектар ер майдонини 30 йилга ижарага бериш юзасидан ўтказилган савдоларда 999 миллиард 999 миллион 999 минг сўмлик таклифи билан ғолибликни қўлга киритган.
Кейинчалик Рихсиев ушбу хабарга муносабат билдириб, ўзи яйловни ижарага олиш ниятида бўлмаганини, онлайн аукцион тизимининг ишлашини ўз кўзи билан кўриш учун тажриба тариқасида шундай қилганини айтиб раддия билдирган.
Бироқ шунга қарамасдан 2022 йил 13 сентябрь куни унинг таъсисчилигида қишлоқ хўжалигига ихтисослашган «Animals Service» МЧЖ ташкил этилганлиги ва у (ўрганиш ўтказилган 23 октябрь ҳолатига) мазкур корхона таъсисчилигидан чиқмагани маълум бўлган.
Вазирлар Маҳкамасининг 1992 йил 6 мартдаги «Тадбиркорлик фаолияти билан шуғулланиш тақиқланган мансабдор шахсларнинг рўйхати тўғрисида»ги қарорида давлат бошқарув органлари ходимлари тадбиркорлик фаолияти билан шуғулланиши тақиқланган.
Шунингдек, 2022 йил 8 август куни қабул қилинган «Давлат фуқаролик хизмати тўғрисида»ги қонуннинг 13-моддасида давлат фуқаролик хизматчиси тадбиркорлик фаолияти билан шуғулланишга ҳақли эмаслиги ҳақидаги қоида белгиланди (мазкур қонун 2022 йил 8 ноябрда кучга киради).
Бундан ташқари, Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидаларида давлат хизматчиларига тадбиркорлик фаолияти билан шуғулланиш тақиқланиши ҳамда ушбу қоидаларнинг бузилиши қонунчилик ҳужжатларига мувофиқ интизомий ва бошқа турдаги жавобгарликка тортиш учун асос ҳисобланиши кўрсатилган.
Шундан келиб чиққан ҳолда, Коррупция қарши курашиш агентлиги томонидан мазкур масалани чуқур таҳлил қилган ҳолда, қонунбузилиши ҳолатларини бартараф қилиш ҳамда тегишли чоралар кўришни сўраб, Тошкент вилоят ҳокимлигига тақдимнома киритилган.
2021—2022 йилнинг 6 ойи давомида Бухоро вилоятида 340 та ҳолатда 34,3 миллиард сўмлик давлат харидларидан 19 та ҳолатда ташкилот раҳбари ва молиявий масалалар бўйича ўринбосарлари, 72 та ҳолатда бухгалтерия ходимлари, 24 та ҳолатда омбор мудири ва таъминот ходимлари, 30 та ҳолатда инженер ва техник назоратчилар, 20 та ҳолатда шартномаларни ҳуқуқий экспертизасини амалга оширувчи юристлар ва қолган ҳолатда бошқа ходимлар харид ижрочисининг таъсисчиси (бенефициари) бўлган.
Шу каби Сурхондарё вилоятида 155 та ҳолатда 16,1 миллиард сўмлик давлат харидларидан 67 та ҳолатда бош ҳисобчи, ҳисобчи ва иқтисодчилар, 60 та ҳолатда хўжалик ва омбор мудирлари, 28 та ҳолатда бўлим бошлиқлари ва бошқа ходимлар харид ижрочисининг таъсисчиси (бенефициари) бўлгани аниқланган.
Масалан, Сурхондарё вилояти ҳокимлиги Ягона буюртмачи хизмати инжиниринг компанияси томонидан 2021 йилда амалга оширилган Термиз шаҳридаги 6-мактаб биносини реконструкция қилиш бўйича 8 миллиард сўмлик давлат харидида ушбу компаниянинг етакчи мутахассиси таъсисчилигидаги масъулияти чекланган жамият билан тўғридан-тўғри шартнома тузилган.
Худди шундай
- Самарқанд вилоятида 277 та ҳолатда 10,9 миллиард сўмлик,
- Фарғона вилоятида 158 та ҳолатда 8,1 миллиард сўмлик,
- Сирдарё вилоятида 20 та ҳолатда 1,6 миллиард сўмлик,
- Қашқадарё вилоятида 66 та ҳолатда 1,1 миллиард сўмлик,
- Навоий вилоятида 14 та ҳолатда 0,3 миллиард сўмлик давлат харидлари бўйича тузилган шартномаларда аффилланганлик ва манфаатлар тўқнашуви ҳолатларига йўл қўйилган.
Изоҳ (0)