Коррупцияга қарши курашиш агентлигида “Коррупцияга қарши курашда коррупция ҳақида хабар беришнинг ўрни ва таъсири” мавзусида ўтказилган сўровнома натижалари ҳамда “Коррупцияга оид ҳуқуқбузарлик ҳақида хабар берган шахсларни ҳимоя қилиш тўғрисида”ги қонун лойиҳаси тақдимоти ўтказилди. Бу ҳақда “Дарё” мухбири хабар бермоқда.
Дастлаб лойиҳа доирасида ўтказилган “Коррупцияга қарши курашда коррупция ҳақида хабар беришнинг ўрни ва таъсири” мавзусидаги сўровнома натижалари тақдимот қилинди.
Тадбирда Коррупцияга қарши курашиш агентлиги директори Акмал Бурҳонов лойиҳа натижалари ҳақида фикр билдирар экан, респондентларнинг ярмидан кўпи хабар бериш оқибатидан қўрқиши ачинарли эканлигини таъкидлаган.
“Респондентларнинг салкам 75 фоизи хабар беришга тайёрлиги бизни қувонтиради, албатта. Бироқ уларнинг ярмидан кўпроғи коррупция ҳақида хабар бериш оқибатларидан қўрқишини билдириши бизни хавотирга солади. Бу эса бизнинг уларга етарли даражада ҳуқуқий асосларни яратиб бермаганлигимизни англатади. Шунингдек, ҳуқуқий билимларини оширишда ҳам ишларни ташкил этишимиз лозимлигини кўрсатади.
Афсус билан айтадиган ҳолат бу респондентларнинг 13,8 фоиздан ортиғи миннатдорлик белгиси сифатида ўзлари хоҳлаб пул бериши, бундан ташқари кенг тарқалган суюнчи бериш каби ҳолатларни одатий қабул қилиниши. Ваҳоланки, бу коррупция жинояти ҳисобланади. Бу ҳам бизни хавотирга соладиган хатарлардан бири ҳисобланади. Бундан ташқари, маҳаллий ҳокимият органларига ишончсизлик бизни ўйлантиради”, дейди Акмал Бурҳонов.
Тадбирда Ўзбекистонда хабар берувчиларни ҳимоя қилиш бўйича қонунчилик асослари, давлат органларида қонунбузарликлар тўғрисида хабар бериш механизмлари, хабар берувчилар тўғрисидаги қонун ҳужжатларининг жорий этилиши ва самарадорлиги билан боғлиқ муаммолар, хабар берувчилар билан алоқа ўрнатиш масалалари атрофлича кўриб чиқилди.
Таъкидланишича, “Коррупцияга оид ҳуқуқбузарлик ҳақида хабар берган шахсларни ҳимоя қилиш тўғрисида”ги қонун лойиҳаси Коррупцияга қарши курашиш агентлиги ходимлари, Корея Республикаси Коррупцияга қарши курашиш ва фуқаролик ҳуқуқлари комиссияси ва БМТ Тараққиёт дастури экспертлари ҳамда манфаатдор вазирлик ва идоралар вакилларидан иборат ишчи гуруҳлар томонидан тайёрланган.
Қонун лойиҳасини ишлаб чиқишдан асосий мақсад коррупцияга нисбатан муросасиз муҳитни шакллантириш, ҳалоллик стандартини жорий қилиш ва манфаатлар тўқнашувига йўл қўймаслик, хабар берган шахсларни ҳимоя қилиш бўйича таъсирчан чоралар кўриш ҳамда рағбатлантириш билан боғлиқ бошқа муносабатларни тартибга солишдан иборат.
Шунингдек, тадбир доирасида қонун лойиҳасини янада такомиллаштириш юзасидан ўзаро фикр алмашилиб, хабар берувчиларни ҳимоя қилиш бўйича халқаро амалиёт ва илғор хорижий тажрибалар билан ўртоқлашилган.
Аввалроқ Ўзбекистонда коррупция ҳақида хабар берганларга ҳимоя чоралари белгиланаётгани хабар қилинганди.
Изоҳ (0)