Япония Либерал-демократик партияси (ЛДП) раиси Шигеру Ишиба парламент қуйи палатасида ўтказилган иккинчи овоз бериш натижаларига кўра бош вазир этиб сайланди.
Бош вазир сайловининг иккинчи босқичи 1994 йилдан бери 30 йил ичида биринчи марта ўтказилди: овоз беришнинг биринчи босқичида номзодларнинг ҳеч бири керакли овозни ололмади.
Биринчи турдаги муваффақиятсизлик
Биринчи тур натижаларига кўра, Исиба 221 та овоз олди. Унинг асосий рақиби, мухолифатдаги Конституциявий-демократик партия вакили Ёсихико Нода – 151 та овозга эга бўлди.
Демократик партия раҳбари Юичиро Тамаки учун 28 депутат овоз берди. Иккинчи турда Сигеру Исиба ва Ёшихико Нода бош вазирлик учун кураш олиб боришди. Энг қизиғи, Исиба овоз бериш жараёнида ухлаб қолди. Лекин бу ҳолат унинг ғалаба қозонишига ҳалақит қилмади.
ЛДП раҳбари 221 та овоз олди, Нода эса 160 та овоз билан кифояланди.
“Мен бош вазир этиб тайинландим. Мен бу масъулиятни тантанали равишда ўз зиммамга оламан”, деди Исиба янги ҳукумат тузилганидан кейинги чиқишида.
Бош вазир, шунингдек, 27 октябрда бўлиб ўтган ўта муваффақиятсиз эрта парламент сайловларидан сўнг ўзи раҳбарлик қилаётган ЛДП партияси “ҳақиқий халқ партияси сифатида қайта туғилиши” зарурлигини таъкидлади.
Парламентнинг тарқатиб юборилиши
1 октябрь куни Япония парламенти Япония сиёсатининг фахрийси, Либерал-демократик партия раҳбари 67 ёшли Сигеру Ишибани бош вазир лавозимига тасдиқлади.
27 сентябрь куни партиянинг аввалги раиси ва бош вазир Фумио Кисида қайта сайланиш учун номзодини қўймасликка қарор қилганидан кейин ЛДП уни ўз етакчиси этиб сайлаганди.
Бош вазир лавозимини эгаллаган Шигеру Ишиба 27 октябрда мамлакатда парламент қуйи палатаси тарқатиб юборилиши ва муддатидан олдин сайловлар ўтказилишини эълон қилди (режалаштирилган сайловлар 2025 йилнинг октябрь ойидан кечиктирмай ўтказилиши керак эди).
ЛДП атрофидаги машмашалар
France-Прессе таъкидлаганидек, эрта сайловларда Исиба Японияда ўнлаб йиллар давомида ҳукмрон партия бўлиб келаётган ЛДП позициясини мустаҳкамлашга умид қилган.
Бироқ сўнгги ойларда партия фаолиятини ноқонуний молиялаштириш билан боғлиқ қатор коррупция ва сиёсий-молиявий можаролар, шунингдек, хайрия йиғишдаги қонунбузарликлар (жумладан, партия маблағларининг бир қисмини ўзлаштириш) натижасида партия рейтинги сезиларли даражада пасайиб кетди.
ЛДП партиясининг баъзи аъзоларининг "Бирлашган черков" тоталитар сектаси билан алоқалари атрофида ҳам жанжал чиқди. ЛДП нуфузининг пасайишига сайловчиларнинг ҳукуматнинг охирги икки йил давомида сурункали инфляцияни жиловлай олмаган иқтисодий сиёсатидан норозилиги ҳам сабаб бўлди.
Трамп ва Исиба
Дональд Трамп АҚШ президенти этиб сайланганидан сўнг Сигеру Исиба Халқаро майдонда жиддий муаммога дуч келмоқда. AFP таъкидлаганидек, АҚШ мамлакатга экспорт қилинадиган товарларга божхона тўловларини кескин оширмоқчи. Бу эса АҚШ билан катта ҳажмдаги экспорт алоқаларига эга Япония учун жиддий синов бўлади. Шунингдек, Трамп Японияга ҳарбий харажатларни ошириш учун босим ўтказишни бошлаши мумкинлиги хабар қилинмоқда.
Япония Бош вазири Сигеру Ишиба душанба куни “АҚШнинг сайланган президенти Дональд Трамп билан бевосита учрашиш ниятида” эканини айтган.
Изоҳ (0)