“Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун 8 ноябрдан кучга кирди. Шу муносабат билан Кадастр агентлиги директори Фаррух Пўлатов ерга эгалик ҳуқуқини олишда фирибгарларга алданиб қолмасликлари учун фуқароларга мурожаат билан чиқди.
“Узоқ йиллар давомида ўзи яшаб келаётган уйини расмийлаштириб олишни ният қилиб юрган ҳалол инсонлар кўп, аммо вазиятдан фойдаланиб, ноқонуний йўллар билан даромад қилишни режа қилиб юрган уддабуронлар ҳам йўқ эмас. Сизларни бундай нопок кимсаларнинг ҳар қандай сўзлари ва ваъдаларига ишонмасликка чақираман”, дейилади мурожаатда.
Унинг билдиришича, 8 ноябрдан бошлаб 2024–2025 йиллар учун тасдиқланган режа-график асосида маҳаллаларда кадастр ходимлари томонидан хатлов ишлари бошланади.
“Биринчидан, маҳаллалар аниқ тасдиқланган режа-график асосида хатловдан ўтказилади. Бири қолиб, иккинчисига ўтилмайди, яъни халқ тили билан айтганда, тезлаштириб беришнинг имкони йўқ. Иккинчидан, хатловдан кейин ‘Эътироф’ дастурига киритилган ҳар бир ҳолат бўйича 15 дан ортиқ вазирлик ва идоралар хулосаларини беради ҳамда космик суратлар ёрдамида таҳлил қилинади. Халқ тили билан айтганда, иложини қилиб ўтказиб бўлмайди”, дейди агентлик раҳбари.
Кадастр агентлиги директорининг маълум қилишича, хатлов жараёнида қонун билан аниқ белгилаб берилган 8 та тоифага кирувчи ҳолатлар ўрганилади. Ҳозирда эгаллаб олиб, қурилиш қилиб қонунийлаштириб олишни режа қилаётганлар жавобгарликка тортилади ва бу ишлар ҳам ахборот тизимлари орқали назорат қилинади.
“Халқ тили билан айтганда, таниш-билиш ўтмайди”, дейди Фаррух Пўлатов.
Агентлик раҳбари ҳар қандай ҳолатда фирибгарлик, тамагирлик ёки коррупция ҳолатларига дуч келган фуқароларни ҳуқуқни муҳофаза қилиш органларига хабар беришга чақирди.
“Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун Қонунчилик палатаси томонидан 9 апрелда қабул қилиниб, Сенат томонидан 21 июнда маъқулланганди. Президент 5 август куни ушбу қонунни имзолаганди.
Қонунга кўра, фуқаролар қуйидаги кўчмас мулкларни ўз номига (ижара ва мулк ҳуқуқи асосида) қонуний ўтказиб олиши мумкин:
- 2018 йил 1 май кунигача якка тартибдаги уй-жой қуриб ўзбошимчалик билан эгаллаган ер ҳамда ундаги бино ва иншоотлар;
- 2018 йил 1 май кунигача фуқаролар ва ташкилотлар томонидан ҳужжатда кўрсатилган майдондан ортиқча эгалланган ер ҳамда ундаги бино ва иншоотлар;
- “бир марталик акция” доирасида ҳуқуқларни эътироф этиш охирига етмаган ер ҳамда ундаги бино ва иншоотлар;
- 2021 йил 8 июнга (ҳокимларнинг ваколати бекор қилингунига) қадар туман (шаҳар) ҳокимлари қарори билан ажратилган, лекин вилоят ҳокими ёки Халқ депутатлари кенгаши томонидан тасдиқланмаган ер;
- боғдорчилик ва узумчилик ширкатлари ҳудудидаги турар жойлар ҳамда улар эгаллаган ер;
- кичик саноат зоналари ҳудудига 2020 йил 9 мартгача жойлаштирилган тадбиркорларнинг ери;
- давлат ордери билан хусусийлаштирилган бинолар ва уйлар эгаллаган ер;
- ҳоким қарори билан мулк ҳуқуқи эътироф этилган бинолар ва уйлар эгаллаган ер участкаси.
Аввалроқ ўзбошимчалик билан эгалланган ер участкаларини расмийлаштириш учун тўлов миқдори маълум қилинганди.
Изоҳ (1)
1978 йил дадамга колхоз Уй бирган т хозирда дадам утиб кетган 3 йил булди лекин соликлар дадамни номида мен яшаяпман узимнинг номимга кадастр кисам буладими