Хитой ҳукумати собиқ амалдор Ли Тзаюнгни турли “самарасиз лойиҳалар” учун 150 миллиард юандан ортиқ маблағни (21 миллиард доллар) исроф қилганликда айблади. Гап 23 та қурилиш объекти ҳақида кетмоқда, улардан 16 таси самарасиз ёки тўхтаб қолган объектлар рўйхатига киритилган.
Ли Тзаюнг Гуйчжоу провинциясининг Люпаншуй шаҳри раҳбари сифатида 2013 йилдан 2017 йилгача давлат маблағлари ҳисобидан инфратузилма лойиҳаларини амалга оширган. Жумладан, у Осиёдаги энг узун канат йўлига эга тоғ-чанғи курортини қуриш учун 3 миллиард юандан ортиқ қарз олган. Ҳозирда бу курорт қурилиши “самарасиз лойиҳа” сифатида тўхтатилган.
Йилига икки ойдан камроқ қор ёғадиган Люпаншуйда яна иккита чанғи курорти аллақачон ташкил этилган бўлиб, учинчи бундай объект маблағ жиҳатидан ўзини оқлаши қийинлиги аввалбошдан аниқ эди.
Хитой ҳукумати вилоятлар инфратузилма лойиҳаларига “ўйламасдан сарфланган” қарзларни тўлаш учун курашаётган бир пайтда маҳаллий ҳукумат қарзларини қисқартиришга бир неча бор ваъда берган.
Аввалроқ Хитойда коррупцияга қарши кураш доирасида бир қатор ҳибсга олишлар амалга оширилганди. Хусусан, 8 январь куни CNPC Хитой миллий нефть корпорациясининг собиқ бош директорининг собиқ ёрдамчиси Сюй Венжун порахўрлик жиноятини содир этишда гумонланиб ҳибсга олинди. Бунгача China Everbright собиқ раҳбари коррупция учун Хитой Коммунистик партиясидан чиқариб юборилган эди.
Изоҳ (0)