Хитой Ташқи ишлар вазирлиги Россия-Украина томонларини ракета зарбалари алмашинувидан кейин вазминликка чақирди. Бу ҳақда вазирлик расмий вакили Лин Жиан брифинг чоғида маълум қилди.
“Ҳозирги шароитда барча томонлар хотиржам ва вазминликни сақлаб туришлари, мулоқот ва маслаҳатлашувлар орқали вазиятни совутишга ҳаракат қилишлари, имкон қадар тезроқ ўт очишни тўхтатишга эришиш учун инқирозни сиёсий йўлга қўйишда шароит яратишлари керак”, деди у.
Хитой аввал ҳам бир неча маротаба можаро тарафларини деескалацияга чақирган эди.
Путин 21 ноябрь куни Украинадаги объектга баллистик ракета зарбаси берилганини тасдиқлаган эди.
Унинг сўзларига кўра, синовлар муваффақиятли ўтган, армия кўзланган мақсадга эришган: “Днепропетровскда Совет иттифоқи давридан бери энг йирик ва машҳур саноат мажмуаларидан бири бўлган, бугунги кунда ракета технологиялари ва бошқа қуроллар ишлаб чиқарадиган Южмаш заводи зарар кўрган”.
“Шу пайтдан бошлаб, биз бир неча бор таъкидлаганимиздек, аввалроқ Ғарб томонидан қўзғатилган Украинадаги минтақавий можаро глобал миқёсда тус олди”, деди Россия етакчиси.
Путин ўз баёнотида Россия ракеталардан фойдаланишдан олдин Украина фуқароларини хавфли зонани тарк этиш ҳақида огоҳлантиришини таъкидлади.
“Россия тинч йўлни афзал кўради, бироқ воқеаларнинг ҳар қандай ривожига ҳам тайёр, жавоб доимо тайёр”, дея қўшимча қилган у.
Украина президенти Владимир Зеленский Россиянинг ҳаракатларини эскалациянинг янги қадами деб атади ва халқаро ҳамжамиятни “қаттиқ” муносабат билдиришга чақирди.
Қўшма Штатлар ва БМТ ҳам “Орешник”нинг ишга туширилишидан хавотир билдирди.
Изоҳ (0)