Хитой мудофаа вазири Ли Шанфу лавозимидан четлаштирилди, унга қарши тергов олиб борилмоқда. Бу ҳақда разведка маълумотларидан хабардор АҚШ расмийларига таяниб, Financial Times хабар берди.
Охирги икки ҳафта давомида Ли Шангфу омма олдида кўриниш бермаган. Вазир 7—8 сентябрь кунлари Вьетнам ва Хитой ўртасидаги мудофаа соҳасидаги ҳамкорлик бўйича йиллик йиғилишда иштирок этиши керак эди. Бироқ Вьетнамга сафари “соғлиғи сабабли” бекор қилинган.
65 ёшли Ли Шангфу мудофаа вазири лавозимига 2023 йил 12 мартда келган. 2018 йилда у Россиядан Су-35 қирувчи самолётлари ва С-400 комплексларини сотиб олгани учун АҚШ санкциялари остида қолган. Вазир этиб тайинланганидан бир ой ўтиб у Москвага ташриф буюрган ва у ерда Россия президенти Владимир Путин билан учрашган.
“Мудофаа вазирининг истеъфоси Пекиннинг ҳарбий ва ташқи сиёсат идорасининг элита аъзолари ўртасидаги тартибсизликнинг яна бир белгиси бўлиши мумкин”, — дейди ФТ.
Ёзда Хитой ташқи ишлар вазири Син Ган узоқ вақт оммага кўриниш бермаганди. Бу унинг “соғлиғидаги ўзгаришлар” билан изоҳланган. Ган истеъфога чиққани кейинроқ маълум бўлган. У атиги олти ой ташқи ишлар вазири лавозимида ишлаган.
Шунингдек, Хитой етакчиси Си Цзиньпин Хитой ядровий кучларига қўмондонлик қилган икки юқори мартабали зобитни — ракета қўшинларига раҳбарлик қилган генерал Ли Ючао ва унинг ўринбосари Лю Гуанбинни лавозимидан олган.
Улар ҳам ишдан олинишига қадар бир неча ой давомида оммага кўриниш бермаган.
“Юқори мартабали ҳарбий амалдорлар махфий маълумотларни ошкор қилганликда гумонланмоқда”, — дейди аноним манба.
Шундан сўнг Си Цзиньпин ва Коммунистик партия армиядаги коррупцияга йўл қўйиб бўлмаслигини эълон қилган.
“Агар мудофаа вазири ва ракета қўшинлари раҳбарларининг лавозимидан четлатилиши коррупция билан боғлиқ бўлса, бу Си Цзиньпиннинг юқори мансабдор шахсларни танлаш бўйича текширув жараёни чуқур нотўғри эканини кўрсатади”, — деди Халқ армияси бўйича марказий разведка бошқармасининг собиқ эксперти Дэннис Уайлдер.
“Менимча, бу Си Цзиньпиннинг армия устидан назоратини шубҳа остига қўймайди, лекин бу тизим қанчалик чуқур коррупциялашгани бўйича эслатма бўлиши керак”, — деб хулоса қилди Германия Marshаll жамғармасининг хитойлик эксперти Бонни Глейзер.
Изоҳ (0)