Европа иттифоқи Хитой компанияларига Россия корхоналари билан ҳамкорлик қилгани учун санкциялар жорий этиб, икки хил стандартларга қўл урмоқда, деди Хитой Ташқи ишлар вазирлиги матбуот котиби Мао Нинг.
Унинг сўзларига кўра, Пекин ҳеч қачон Россия-Украина можаросида қатнашаётган томонлардан бирига қурол етказиб бермаган.
25 ноябрь куни Bloomberg агентлиги “Еттилик гуруҳи” ва Европа иттифоқининг Хитойга қарши чекловчи чоралар, жумладан, “Россияга ҳарбий ёрдам кўрсатгани учун” санкция қўллаши ҳақида хабар берган эди.
“Аксарият давлатлар, жумладан, Европа ва АҚШ ҳозирда Россия билан савдо қилмоқда. Биз Европа томонини икки хил стандартларни қўлламасликка чақирамиз. Хитой ва Россия компаниялари ўртасидаги мунтазам алмашинув ва ҳамкорлик ҳеч кимга қарши эмас. Бу муносабатлар учинчи томоннинг аралашуви ёки таъсирига дучор бўлмаслиги керак”, деди Мао Нинг.
Унинг қўшимча қилишича, Хитой ҳар доим икки мақсадли маҳсулотлар, шу жумладан, фуқаролик дронлари экспортини назорат қилади. “Украина масаласида Хитой доимо тинчлик ва музокаралар учун ҳаракат қилган”, дея таъкидлади Хитой ТИВ вакили. Унинг қўшимча қилишича, Хитой ҳали ҳам бир томонлама санкцияларга қарши.
Bloomberg манбаларга таяниб ёзишича, Еврокомиссия россиялик фирмаларга электрон компонентлар етказиб бериш орқали дронларни яратишда ёрдам бергани айтилаётган Хитой компанияларига қарши санкциялар қўллаш имкониятини кўриб чиқмоқда.
Айни пайтда, 25-26 ноябрь кунлари Италияда бўлиб ўтадиган “Еттилик гуруҳи” мамлакатлари ташқи ишлар вазирлари “Россиянинг ҳарбий ҳаракатларини қўллаб-қувватлаганликлари учун” Хитой ва бошқа давлатларга нисбатан санкцияларни жорий этишга тайёрламоқда, деб хабар берди Bloomberg.
Аввалроқ АҚШнинг сайланган президенти Дональд Трамп учта давлат — Мексика, Канада ва Хитой товарларига божлар жорий этмоқчи экани хабар қилинганди.
Трамп Мексика ва Канада товарларига 25 фоизлик, Хитойникига эса 10 фоизлик бож жорий этишини режалаштирган.
Изоҳ (0)