Сомалининг 22 мингдан ортиқ аҳолиси, жумладан 11 мингдан зиёд бола, мамлакатнинг марказий қисмидаги Махас туманидаги шиддатли жанглар сабабли уйларини ташлаб кетишга мажбур бўлди. Бу ҳақда БМТнинг Гуманитар масалаларни мувофиқлаштириш бошқармаси Reliefweb ахборот хизмати “Болаларни қутқаринг” халқаро ташкилотига асосланиб хабар берди.
“Шиддатли жанглар оқибатида Сомалининг марказий қисмидаги Махасда 22 мингдан ортиқ киши, шу жумладан 11 мингдан зиёд бола бошқа жойларга кўчирилди”, дейилади хабарда.
Бошқарманинг қўшимча қилишича, “Хирон минтақасида маҳаллий қўшинлар, ҳукумат кучлари ва нодавлат қуролли гуруҳлар ўртасидаги тўқнашувлар сўнгги икки ой ичида кучайиб, 27 июль куни эса вазият кескин тус олган”.
“Болаларни қутқаринг” ташкилотининг таъкидлашича, жанглар авж олган шароитда улар қўллаб-қувватлаётган 21 та тиббиёт марказининг иши тўхтатилгани чуқур ташвиш уйғотмоқда. Можаро натижасида сув манбалари шикастланди ва озиқ-овқат билан боғлиқ вазият сезиларли даражада ёмонлашди. Ташкилот “ўғил болаларни жанговар ҳаракатларда қатнашишга жалб қилиш ҳақидаги хабарлар кўпайиб бораётгани”дан хавотирда.
Маҳаллий ҳокимият ва гуманитар ташкилотлар маълумотларига кўра, сўнгги икки ой ичида Сомалининг марказий ва жанубий қисмидаги можаролар Хиран ва Гедо минтақаларида 100 мингга яқин одамнинг кўчиб кетишига сабаб бўлган, бу эса “шундоқ ҳам чекланган маҳаллий ресурсларга қўшимча юк бўлмоқда”.
Бундан аввал сўнгги бир йил ичида ўн минглаб исроилликлар урушдан қочиш мақсадида Исроилдаги уйларини тарк этишга қарор қилишгани хабар қилинганди. Баъзи муҳожирлар шу йўл билан Исроил бош вазири Биньямин Нетаньяху сиёсатига норозилигини ҳам билдирмоқда.
Изоҳ (0)