Украинадаги урушни тугатишнинг 5 та йўли маълум қилинди

АҚШ президенти Дональд Трамп яқин кунларда Россия раҳбари Владимир Путин билан урушни тугатиш бўйича музокаралар олиб боради. CNN нашри учрашувдан сўнг Украинадаги уруш якунланишининг 5 та эҳтимолий сценарийсини эълон қилди.

Мазкур сценарийлардан фақат биттаси Украина учун ижобий ҳисобланади. Шунга қарамай, уларнинг ҳеч бири Киевнинг иштирокисиз амалга ошмайди.

Ўт очишни тўхтатиш

Журналистлар фикрича, бу вариант эҳтимолдан йироқ. Россия янги санкциялар таҳдидига қарамай, баҳорда бундай таклифни рад этган. Ҳозир Москва шарқда фаол ҳужум қилиб, ҳудудий ютуқларини мустаҳкамлашга уринмоқда. Ҳатто Россиянинг ҳамкорлари бўлган Хитой ва Ҳиндистонга қўшимча босим ҳам кузгача бу позицияни ўзгартирмаслиги мумкин. Октябрьгача рус армияси Покровск, Константиновка ва Купянскни эгаллаб олиши кутилмоқда.

Муддати узайтирилган музокаралар

Энг реал сценарийлардан бири — қиш келиши билан фронт чизиғида урушни “музлатиб қўйиш”. Агар Россия юқоридаги шаҳарларни эгаллаб олса, музокараларда устун мавқега эга бўлади. Бу вариантда россияпараст номзодни Украинада ҳокимиятга олиб келиш режаси ҳам кўриб чиқилмоқда.

Украина яна икки йил урушга бардош бера олади

Бу сценарийда АҚШ ва Европа иттифоқининг ҳарбий ёрдами Киевга мавжуд чегараларни сақлаб қолиш имконини беради. Шунингдек, Москвани яна музокараларга қайтишга ундайди. Агар фронтда муваффақиятга эришилса, Европа Киев ва йирик шаҳарлар яқинида логистика ва разведкага ёрдам берадиган “тийиб туриш кучлари” — НАТО контингентини юбориши мумкин.

Украина ва НАТО учун фалокат

Таҳлилчиларга кўра, агар АҚШ ёрдами тўхтаса ва Трамп ҳамда Путин ўртасида шартли “юмшаш” юз берса, Россия шарқий фронтни ёриб ўтиб, Украина ичкарисига кириб бориши мумкин. Европа вазиятни назоратда ушлаб қолишга уринади, бироқ АҚШсиз бунга кучи етмаслиги эҳтимоли бор. Бу энг ёмон сценарий бўлиб, Украина мудофааси қулаши, сиёсий инқироз ва ҳатто давлат мустақиллигини йўқотиш хавфига олиб келади.

Путин учун ҳалокат: Афғонистон сценарийси

Ҳарбий ресурсларнинг тугаши, санкцияларнинг кучайиши, Хитой ва Ҳиндистоннинг қўллаб-қувватлови заифлашиши ҳамда элита ичидаги норозилик Россияни урушни тугатишга мажбурлаши мумкин. Оқибатда Москва Афғонистонда бўлгани каби Украинадан ўзи чиқиб кетади.

Евгений Пригожин (собиқ “Вагнер” раҳбари) қўзғолони тизим аслида кўринганидек барқарор эмаслигини аллақачон кўрсатган. Бу сценарийда Путин кутилмаганда ҳамма нарсасини йўқотмагунча кучли кўринади.