Малайзиялик 28 ёшли Фараҳ Файзал ҳомиладорлик даврида юз берган кескин гормонал ўзгаришлари туфайли ташқи кўриниши бир неча ўн ёшга кексароқ кўрина бошлади. У юзида пайдо бўлган чуқур ажинлар, яллиғланиш ва йирингли тошмалар акс этган постни TikTok’да эълон қилгач, видео қисқа фурсатда 100 миллиондан ортиқ фойдаланувчиларни жалб қилди.
Фараҳнинг айтишича, ҳомиладорлик даврда унинг териси тўсатдан ўзгаришни бошлаган: кундан-кунга қичишиш, қизариш, тошмалар каби аломатлар кучайган. У нафақат ташқи кўринишидаги ўзгаришлардан, балки ўзини ойнада танимай қолганидан ҳам руҳий тушкунликка чуқур ботган.
“Ҳар куни эрталаб ойнага қараганимда янги тошмаларни кўрар эдим, юзимда оғриқли йиринглар тўлиб кетган, ажинлар ҳам чуқурлашиб кетган эди. Ташқи кўринишим ёшимга мутлақо мос келмай қолган эди, дея эслайди у.
Бўлажак онага авваллари фойдаланиб келган терини парвариш қилиш воситалари ҳам самара бермай қолган. Бунинг устига, Фараҳнинг бурни ва қулоқлари катталашган, териси дағаллашган. Аёл ўзининг бу ҳолатини яширишга уриниб, кўчада ниқоб тақиб юришга мажбур бўлган, суратларга тушишдан бош тортган, одамлар орасида ўзини ноқулай ҳис қилган.
“Бу ҳаётимдаги энг оғир даврлардан бири эди. Танамда нималар бўлаётганини тушунмасдим. Бу ҳолат мени жуда қўрқитар эди”, дейди Фараҳ.
Бироқ у бу синовлардан Фараҳ ёлғиз ўзи ўтмади. Унинг руҳий саломатлигини сақлаб қолишда энг катта таянчи турмуш ўртоғи бўлди.
“Турмуш ўртоғим менга доимо таскин берарди. Ташқи кўринишим қандай бўлишидан қатъи назар, у мени ҳар доим гўзал ва кучли инсон деб билишини айтарди”, дейди Фараҳ миннатдорчилик билан.
Фарзанди дунёга келгач, Фараҳнинг тери ҳолати аста-секин яхшилана бошлаган. Яллиғланишлар деярли йўқолган, тери ҳолати ҳам аста тикланиб бормоқда. Шунга қарамай, тўлиқ соғайиш жараёни ҳали ҳам давом этмоқда.
Мутахассисларнинг фикрича, бу каби жиддий ва кескин ўзгаришлар ҳомиладорлик даврида юз берадиган камёб тери касаллиги — rosacea fulminan, pyoderma faciale номли розацела хасталигининг оғир формаси билан боғлиқ бўлиши мумкин. Улар юзда яллиғланган тугунчалар пайдо қилиш, тери тузилмасининг ўзгартириш билан намоён бўлади. Дерматологлар бу ҳолатни антибиотиклар ёки гормонал дори воситалари билан даволашни тавсия этади.
Малайзиянинг Sinar Daily нашр хабар беришича, ҳомиладорлик вақтида эстроген ва прогестерон гормонлари миқдорининг ошиши аёлларда тери сезувчанлигининг ортиши, тошмалар, пигментация ва бошқа нохуш ҳолатларга сабаб бўлиши мумкин.
Изоҳ (0)