Ғарб давлатлари 2025 йилдан бошлаб Россияни 4-авлод ядровий реакторларини ривожлантириш бўйича халқаро лойиҳадан четлатишни режалаштирмоқда. Бу ҳақда Буюк Британия энергия хавфсизлиги ва углерод нейтраллиги департаменти баёнотида айтилади.
“Generation IV халқаро форуми ядровий хавфсизлик стандартларини ҳурмат қилишга тайёр томонлар ўртасидаги келажакдаги ҳамкорликни таъминлаш учун Россияни ўз йиғилишларига жалб қилмайди”, дейилади хабарда.
Баёнотда Бокуда бўлиб ўтган БМТнинг иқлим ўзгариши бўйича доиравий конвенцияси (CОP29) иштирокчиларининг 29-конференцияси доирасида Буюк Британия энергетика хавфсизлиги ва углерод нейтраллиги вазири Эд Милибанд ва АҚШ энергетика вазири ўринбосари Девид Тёрк 2025 йил 1 мартдан кучга кирадиган ядровий тадқиқотлар ва ишланмалар соҳасидаги ҳамкорлик тўғрисида келишув имзолагани таъкидланган.
Лондон Австралия, Атом энергияси бўйича Европа ҳамжамияти, Канада, Хитой, Корея Республикаси, Франция, Швейцария, Жанубий Африка ва Япония ҳам янги шартномага қўшилишига умид билдирди.
4-авлод ядро реакторларини ишлаб чиқиш бўйича халқаро лойиҳа 2000 йилда Қўшма Штатлар ташаббуси билан бошланган. Форум иши доирасида ҳозирда ривожланиш учун истиқболли деб ҳисобланган олтита реактор технологияси аниқланган: газ билан совитилган тез реактор, қўрғошин билан совитилган тез реактор, эриган туз реактори, натрий билан совитилган тез реактор, сув билан совитилган ўта критик реактор ва юқори ҳароратли газ билан совитилган реакторлар.
Аввалроқ Россия президенти Владимир Путин ядро триадаси мамлакат суверенитети ва хавфсизлигининг ишончли кафолати эканини айтиб ўтганди.
“Айнан ядро триадаси мамлакатимиз суверенитети ва хавфсизлигининг ишончли кафолати бўлиб қолаётганини яхши тушунамиз. У глобал барқарорликнинг объектив факти сифатида стратегик тўхтатиб туриш муаммоларини ҳал қилиш, шунингдек, ядро паритети ва дунёдаги кучлар мувозанатини сақлаш имконини беради”, деган Путин ядровий тўсиқ бўйича машғулотлар чоғида.
- Классик “ядро триадаси” қуруқлик, денгиз ва ҳаво компонентларидан иборат. Ҳозир (1991 йилдан бери) барча ядровий давлатлар ичида фақат АҚШ ва Россия ядровий триадага эга.
Изоҳ (0)