Ўзбекистоннинг Бельгиядаги элчиси Ғайрат Фозилов Нидерландияда (қароргоҳи Брюссел шаҳрида жойлашган) ҳам элчи этиб тайинланди. Бу ҳақда “Дунё” АА хабар берди.
Ғайрат Фозилов ушбу давлат Ташқи ишлар вазирлигининг Протокол ва қабул қилувчи мамлакат билан алоқалар департаменти директори Хансу Акербумга ишонч ёрлиқлари нусхасини топширди.
Томонлар сиёсий-дипломатик, парламентлараро, савдо-иқтисодий ва инвестициявий соҳалардаги Ўзбекистон ва Нидерландия ўртасидаги ўзаро муносабатларнинг ривожланиб бораётган динамикасини мамнуният билан қайд этди.
2024 йилнинг апрель ойида Тошкент шаҳрида икки давлат ташқи сиёсат идоралари ўртасида ўтказилган сиёсий маслаҳатлашувларнинг навбатдаги давраси якунлари ижобий баҳоланди ва бу механизмни мунтазам йўлга қўйиш зарурлиги таъкидланди.
Суҳбат чоғида икки ва кўп томонлама форматдаги келгуси режалар, турли даражадаги бўлажак учрашув ва тадбирлар жадвали юзасидан ҳам фикр алмашилди.
Ханс Акербум Протокол бўлими элчихона фаолиятини, жумладан, Ўзбекистон-Нидерландия мулоқотини мустаҳкамлашда ҳар томонлама ёрдам беришини тасдиқлади.
Ғайрат Фозилов 2015–2017 ва 2021–2023 йилларда Ўзбекистон ташқи ишлар вазирининг ўринбосари лавозимида ишлаган. ТИВ қошидаги Жаҳон иқтисодиёти ва дипломатия университетини тамомлаган.
1996 йилдан буён ТИВ тизимида фаолият юритиб келмоқда. Дипломатик хизматини Европа давлатлари билан ҳамкорлик бўйича бошқарма атташеси сифатида бошлаган. ТИВ марказий аппаратида, Президент ҳузуридаги Миллий хавфсизлик кенгашида, шунингдек, Ўзбекистоннинг Франция ва Бельгиядаги элчихоналарида, НАТО ҳузуридаги миссияда турли лавозимларда ишлаган. 2018—2021 йилларда Япониядаги элчи вазифасида фаолият юритган.
У 2023-нинг 5 декабрь куни Бельгия пойтахтига етиб борганди.
Дипломат француз ва инглиз тилини билади.
Изоҳ (0)