18 ноябрь куни бўлиб ўтадиган йиғилишда Европа иттифоқи ташқи ишлар вазирлари Украинанинг Ғарб қуроллари билан Россияга зарба беришига қўйилган тақиқни олиб ташланишини муҳокама қилади. Бу ҳақида Европа дипломатияси раҳбари Жосеп Боррел хабар берди.
Боррелнинг сўзларига кўра, у ҳамиша Россия ҳудудига зарба йўллаш учун Украинага рухсат бериш тарафдори бўлган. Боррел Европа иттифоқига аъзо давлатлар бу қарорни қўллаб-қувватлашига умид билдирди.
“Мен Украина биз берган қуроллардан нафақат ўқларни қайтариш, балки камончиларни йўқ қилиш учун ҳам фойдаланиши кераклигини бир неча бор таъкидлаганман”, деди Боррел Брюсселда ташқи ишлар вазирлари билан учрашувдан олдин.
У Европа иттифоқи давлатлари ҳам шундай қарорга келиши кераклигига ишонч билдирди. “Умид қиламанки, аъзо давлатлар бунга рози бўлишади”, деди дипломат.
Бир кун аввал The New York Times ўз манбаларига таяниб, АҚШ президенти Жо Байден Украинага Американинг узоқ масофали ATACMS ракеталарини Россия ҳудудига, хусусан, Курск вилоятига отишига рухсат бергани ҳақида хабар қилганди.
Кейинроқ Франциянинг Le Figaro нашри Украина Қуролли кучларига қўйилган чекловларни олиб ташлаш тарафдори бўлган Франция ва Буюк Британия Россия ҳудудида SCALP ва Сторм Shadow ракеталари билан зарба йўллашга рухсат берганини ёзди. 18 ноябрь куни эрталаб газета ушбу хабарни ўз сайтидан ўчириб ташлади.
Axios маълумотларига кўра, АҚШ ўтган ҳафта охирида Украинани чекловлар бекор қилингани ҳақида хабардор қилган. Россия президенти Владимир Путиннинг таъкидлашича, Ғарбнинг узоқ масофага мўлжалланган қуроллари билан Россия ҳудудига зарба бериш тақиқини бекор қилиш НАТО давлатларининг ҳарбий можарога бевосита аралашувини англатади ва урушнинг моҳиятини “сезиларли даражада ўзгартиради”.
Изоҳ (0)