Дания Украинага олтита F-16 қирувчи самолётини топширди ва Киевга яна 13 та самолёт етказиб беришни режалаштирмоқда.
Бу ҳақда Дания бош вазири Метте Фредериксен Владимир Зеленский билан ўтказган қўшма матбуот анжуманида маълум қилди.
“F-16 қирувчи самолётлари бўйича режаларимиз ўзгармади. Олтита F-16 аллақачон етказиб берилди — бу биринчи партия. Кейин яна бир партия бўлади, жами 19 та қирувчи самолётларни етказиб берамиз”, деди у.
Дания бош вазири, шунингдек, Киевга тўғридан тўғри Украина мудофаа саноатига 130 миллион евродан ортиқ миқдорда ҳарбий ёрдамнинг янги пакети ажратилишини ҳам маълум қилди.
13 ноябрь куни Франция Украинага олтита Mirage қирувчи самолётларини етказиб бериши маълум қилинганди. Франция Миллий ассамблеяси депутати Франк Жилетти парламентнинг миллий мудофаа ва мамлакат қуролли кучлари қўмитасига тайёрланган маърузасида бу ҳолатни танқид қилган.
“Қисқа муддатда олтита Mirage 2000-5 самолётининг Украина ҳарбий-ҳаво кучларига топширилиши ва у билан боғлиқ тўлиқ қўллаб-қувватлаш модели бизнинг қирувчи самолётларимизнинг индивидуал форматини янада заифлаштиради”, деган у.
Норвегия мудофаа вазири Бьорн Арилд Грам октябрь ойи охирида F-16 қирувчи самолётларининг жанговар қобилиятини сақлаб қолиш учун Киевга 118 миллион доллар ажратилишини маълум қилган.
Осло 2024—2025 йилларда Украинага олтита F-16 самолётларини етказиб бермоқчи. Шунингдек, украиналик учувчиларни Данияда ўқитишга ёрдам бериш режалаштирилган.
Изоҳ (0)