Америкалик миллиардер Илон Маск Нью Йоркда Эроннинг Бирлашган миллатлар ташкилотидаги элчиси Амир Саид Иравоний билан учрашди. Бу ҳақда The New York Times хабар берди.
Эрон расмийларига кўра, учрашув бир соатдан кўпроқ вақт давомида махфий жойда бўлиб ўтган. Суҳбат Эрон ва АҚШ ўртасидаги кескинликни камайтириш масалаларига бағишланган. Эрон вакиллари учрашувни “ижобий” деб атаган ва бундан буён ҳам мулоқот бўлишига умид билдирган.
Трампнинг коммуникациялар бўйича директори Стивен Ченг учрашувга изоҳ беришдан бош тортган. Миллиардер Илон Маск ҳам ҳеч қандай муносабат билдирмаган. Мазкур суҳбат Трамп даврида Теҳрон ва Вашингтон ўртасидаги алоқалар ўзгариши эҳтимолини оширмоқда. Учрашувни айнан Маск сўрагани, Эрон элчиси эса жой танлагани айтилмоқда.
Таъкидланишича, учрашувда элчи Иравоний Эрондан санкцияларни олиб ташлаш ва Маскка бизнесининг бир қисмини Теҳронга олиб ўтишга эришиши кераклигини айтган.
Маск ва Трампнинг алоқалари. Нималар маълум?
Бизнесмен Илон Маск АҚШнинг сайланган президенти Дональд Трампнинг тарафдори ҳамда донори бўлган. 5 октябрь куни у Трампнинг Пенсилваниядаги сайловолди митингида нутқ сўзлаган. Миллиардер “Америкада конституция ва демократияни сақлаб қолиш учун” Трамп ғалаба қозониши кераклигини айтган.
Сентябрь ойи бошида АҚШ собиқ президенти сайловда ғалаба қозонган тақдирда, Илон Маск бошчилигида ҳукумат самарадорлигини ошириш бўйича комиссия тузишини билдирган. Маск кейинчалик бу масалани Трамп билан муҳокама қилгани ва ҳамкорликдан манфаатдор эканини тасдиқлаган.
Шунингдек, миллиардер президентлик сайловларида республикачи мағлубиятга учраган тақдирда, уни ҳибсга олишлари мумкинлигини айтган. Financial Times Маск Трампнинг президентлик кампаниясини қўллаб-қувватлаш учун қарийб 75 миллион доллар ажратгани ҳақида хабар берган. Маблағларнинг аксарияти рекламаларга сарфланган.
Изоҳ (0)