Американинг Penn Biden Center таҳлил марказида АҚШнинг амалдаги президенти Жо Байденнинг вице-президентлик давридаги махфий ҳужжатлар топилди. АҚШ бош прокурори Меррик Гарланд махфий ҳужжатлар қандай қилиб таҳлил марказига бориб қолганини текширишни буюрди. Бу ҳақда CBS News хабар берди.
Ҳужжатлар яширин маълумотни ўз ичига олмаган бошқа қоғозлар билан бирга сақланган. Материаллар ноябрь бошида, оралиқ сайловлар арафасида Байденнинг ишончли вакиллари томонидан топилган.
Шундан кейин бу ҳақда АҚШ миллий архивига хабар берилган. Байденнинг адвокатлари ҳужжатларни топширишни таклиф қилди, у вақтда материалларни тақдим этиш ҳақида сўров ҳали келиб тушмаганди.
CBS маълумотларига кўра, суриштирувда ФҚБ (Федерал қидирув бюроси) ва Чикаго прокурори қатнашмоқда.
АП ёзишича, бу текширувдан қатъи назар, Жо Байден махфий ҳужжатлардан нотўғри фойдаланиб келгани президент учун сиёсий «бошоғриқ»га айланиши мумкин. Аввалроқ Байден ўзидан аввалги президент Дональд Трамп билан юз берган шунга ўхшаш вазиятни танқид қилиб, унинг юзлаб махфий қайдларни ўзининг Флоридадаги хусусий уйида сақлаш қарорини «масъулиятсизлик» деб атаганди.
2022 йил августида Трампнинг уйидан махфий маълумотлардан иборат ҳужжатлар топилганди. Собиқ давлат раҳбари «Жосуслик тўғрисидаги қонун»ни бузганликда гумонланмоқда. Бу иш бўйича махсус прокурор тайинланган.
Изоҳ (0)