ФҚБ Трампнинг уйидан махфий ҳужжатларнинг 11 та тўпламини топган. Тинтув жосуслик тўғрисидаги қонун бузилиши ҳақидаги иш бўйича ўтказилган

АҚШ Федерал қидирув бюроси (ФҚБ) агентлари 8 август куни собиқ президент Дональд Трампнинг Флоридадаги Мар-а-Лаго қароргоҳида ўтказилган тинтув чоғида махфий ҳужжатларнинг 11 та тўпламини мусодара қилган. Бу ҳақда The Wall Street Journal мусодара қилинган материаллар рўйхатига таяниб хабар бермоқда, деб ёзади Meduza.

Рўйхатда, шу жумладан, «ўта махфий» белгиси туширилган ҳужжатлар ҳам бўлиб, улардан фақат махсус давлат муассасаларидагина фойдаланиш мумкин.

Трампнинг адвокатлари қайд этишича, собиқ президент Оқ уйни тарк этгунига қадар, ўз ваколатлари доирасида, топилган ҳужжатларни фош қилган. Трампнинг ўзи айтишича, ФҚБ агентлари ошкор этилган ҳужжатларни мусодара қилиши шарт эмасди: бюро «сиёсат ўйинини ўйнамасдан ва Мар-а-Лагога бостириб кирмасдан ҳам» уларни исталган вақтда олиши мумкин эди.

The Washington Post манбаларига таяниб хабар беришича, ФҚБ агентлари Трамп қароргоҳидаги тинтув чоғида қидирган нарсалар орасида ядро қуролига алоқадор ҳужжатлар ҳам бўлган. Бундай ҳужжатлар топилган-топилмагани номаълум. Трамп WP хабарини изоҳлар экан, «ядро қуроли ҳақидаги масала — бу алдоқчилик» деди.

ФҚБ агентлари Трампнинг уйидан ҳужжатлар, фотосуратлар ва қайдлардан иборат жами 20 тача қутини олиб кетган. Мусодара қилинган ҳужжатларнинг уч саҳифали рўйхатида Трампнинг ўз собиқ маслаҳатчиси Рожер Стоунни афв этиш ҳақидаги фармони ҳамда «Франция президенти» ҳақидаги маълумот ҳам бор.

Politico маълумотларига кўра, журналистлар қўлига келиб тушган тинтув учун ордерда айтилишича, ФҚБ Дональд Трампни адолатга тўсқинлик қилишда ва жосуслик ҳақидаги қонунни эҳтимолий бузганликда гумонламоқда.

Эслатиб ўтамиз, аввалроқ Дональд Трамп, Мар-а-Лагодаги қароргоҳида ўтказилган тинтувлардан кейин, ўзига қарши гувоҳлик беришдан бош тортган эди.

ФҚБ агентлари 8 август, душанба куни Трампнинг Флоридадаги Мар-а-Лаго қароргоҳида тинтув ўтказган эди. The New York Times вазиятдан хабардор манбаларига таяниб ёзишича, ФҚБ Трампнинг уйини у Оқ уйни тарк этганидан кейин ўзи билан олиб кетган ҳужжатлар туфайли тинтув қилмоқда. Ҳужжатларда махфий маълумотлар бўлиши мумкин.

Нашрга кўра, АҚШ миллий архиви «кўп ойлар давомида» 15 қути ҳужжатларни қайтаришни сўраган ва ушбу ҳужжатлар йўқ қилиниши эҳтимоли юзасидан ФҚБга мурожаат қилган. «Жаноб Трамп ўз президентлиги даврида ҳукумат архивларида сақланиши керак бўлган расмий қоғозларни йўқ қилиб ташлагани билан танилган», — деб ёзади газета.