АҚШнинг Аризона штати Финикс шаҳрида Федерал қидирув бюроси (ФҚБ) идораси яқинида собиқ президент Дональд Трампнинг қуролланган тарафдорлари тўпланди, деб ёзади «РБК». Яқинда унинг Флоридадаги қароргоҳида ФҚБ тинтув ўтказган эди.
Йиғилганлардан бири айтишича, гуруҳ Трампни қўллаб-қувватлаб, унинг Мар-а-Лаго қароргоҳидаги, уларнинг фикрича, ноқонуний тинтувга қарши норозилик билдириш истагида бўлган.
ФҚБ қайд этишича, идора яқинида тахминан 25 киши «тинч тарзда» тўпланиб, тротуарларга ва кўча бўйлаб жойлашиб олган, улар бюрога тегишли ҳудудга ўтмаган. Кейинроқ улар тарқала бошлаган.
Трампнинг уйида ўтказилган тинтувдан кейин АҚШ ҳуқуқ-тартибот органлари, хусусан, ФҚБга таҳдидлар келиб туша бошлаган. Бюро бундай таҳдидларни «ножўя ва хавфли» деб атади. 12 август куни Огайода АҚШ Ҳарбий-денгиз кучлари фахрийси, Трампнинг тарафдори деб тахмин этилаётган шахс ФҚБ идорасига ҳужум қилди, аммо қўлга олиш чоғида отиб ташланди.
Шундай воқеалар фонида республикачилар Мар-а-Лагодаги тинтув ва ҳужжатлар мусодарасининг қонунийлигини исботловчи материаллар эълон қилинишини талаб этди. АҚШ Адлия вазирлиги ҳам шундай даъват билан чиқди ва тинтув учун ордер оммага ҳавола этилиши керак, деб ҳисоблади.
ФҚБ агентлари 8 август, душанба куни Трампнинг Флоридадаги Мар-а-Лаго қароргоҳида тинтув ўтказган эди. The New York Times вазиятдан хабардор манбаларига таяниб ёзишича, ФҚБ Трампнинг уйини у Оқ уйни тарк этганидан кейин ўзи билан олиб кетган ҳужжатлар туфайли тинтув қилмоқда. Ҳужжатларда махфий маълумотлар бўлиши мумкин.
Нашрга кўра, АҚШ миллий архиви «кўп ойлар давомида» 15 қути ҳужжатларни қайтаришни сўраган ва ушбу ҳужжатлар йўқ қилиниши эҳтимоли юзасидан ФҚБга мурожаат қилган. «Жаноб Трамп ўз президентлиги даврида ҳукумат архивларида сақланиши керак бўлган расмий қоғозларни йўқ қилиб ташлагани билан танилган», — деб ёзади газета.
Трампнинг сўзларига кўра, агентлар тинтув чоғида ҳатто унинг сейфини ҳам бузиб очган. Собиқ президент ФҚБ хатти-ҳаракатларини сиёсий тусга эга деб атади. Унинг ишонч билдиришича, амалдаги президент Жо Байден ФҚБнинг тинтув ўтказиш ниятидан хабардор бўлган. Агар иш расман айблов эълон қилишгача бориб етса, Трамп 2024 йилги президентлик сайловига ўз номзодини қўйиш имкониятидан маҳрум бўлиши мумкин.
Кейинроқ маълум бўлишича, ФҚБ агентлари тинтув чоғида махфий ҳужжатларнинг 11 та тўпламини мусодара қилган. Рўйхатда, шу жумладан, «ўта махфий» белгиси туширилган ҳужжатлар ҳам бўлиб, улардан фақат махсус давлат муассасаларидагина фойдаланиш мумкин.
ФҚБ агентлари Трамп қароргоҳидаги тинтув чоғида қидирган нарсалар орасида ядро қуролига алоқадор ҳужжатлар ҳам бўлган. Бундай ҳужжатлар топилган-топилмагани номаълум. Трамп WP хабарини изоҳлар экан, «ядро қуроли ҳақидаги масала — бу алдоқчилик» деди.
ФҚБ агентлари Трампнинг уйидан ҳужжатлар, фотосуратлар ва қайдлардан иборат жами 20 тача қутини олиб кетган. Мусодара қилинган ҳужжатларнинг уч саҳифали рўйхатида Трампнинг ўз собиқ маслаҳатчиси Рожер Стоунни афв этиш ҳақидаги фармони ҳамда «Франция президенти» ҳақидаги маълумот ҳам бор.
Politico маълумотларига кўра, журналистлар қўлига келиб тушган тинтув учун ордерда айтилишича, ФҚБ Дональд Трампни адолатга тўсқинлик қилишда ва жосуслик ҳақидаги қонунни эҳтимолий бузганликда гумонламоқда.
Изоҳ (0)