Оқ уй: махфий ҳужжатлар Байденнинг офиси ва уйига тасодифан бориб қолган

АҚШ президентининг махсус вакили Ричард Заубер ишонч билдиришича, суриштирув Жо Байденнинг офиси ва уйида топилган махфий ҳужжатлар у ерга тасодифан бориб қолганини кўрсатади. Унинг қайд этишича, Оқ уй бутун текширув давомида Адлия вазирлиги билан яқиндан ҳамкорлик қилган ва иш бўйича махсус прокурор билан ҳамкорликни давом эттирмоқда, деб ёзади The Hill.

«Ишончимиз комилки, пухта текширув бу ҳужжатлар бехосдан йўқолиб қолганини кўрсатади, президент ва унинг адвокатлари эса бу хатолик юзага чиққанидан кейин зудлик билан чоралар кўрган», — дейилади Заубернинг баёнотида.

12 январь куни АҚШ адлия вазири махфий ҳужжатлар Вашингтонда қачонлардир Жо Байден ишлаган таҳлил маркази офисига ва унинг Делавердаги хусусий уйига қандай бориб қолганини текшириш учун махсус прокурор тайинлаган эди.

10 январь куни Американинг Penn Biden Center таҳлил марказида АҚШнинг амалдаги президенти Жо Байденнинг вице-президентлик давридаги махфий ҳужжатлар топилгани хабар берилган эди.

Ҳужжатлар яширин маълумотни ўз ичига олмаган бошқа қоғозлар билан бирга сақланган. Материаллар ноябрь бошида, оралиқ сайловлар арафасида Байденнинг ишончли вакиллари томонидан топилган.

Шундан кейин бу ҳақда АҚШ миллий архивига хабар берилган. Байденнинг адвокатлари ҳужжатларни топширишни таклиф қилди, у вақтда материалларни тақдим этиш ҳақида сўров ҳали келиб тушмаганди.

Улар орасида Америка разведкаси ҳамда Украина, Эрон ва Буюк Британияга оид брифинглар материаллари бўлган.

CBS маълумотларига кўра, суриштирувда ФҚБ (Федерал қидирув бюроси) ва Чикаго прокурори қатнашмоқда.

Кейинроқ Байденнинг Делавер штати Уилмингтон шаҳридаги уйида махфий ҳужжатлар аниқланди. Маълум қилинишича, махфий ҳужжатлар гараждаги омборхонадан топилган, улар аслида архивда сақланиши керак бўлган.

Байденнинг шахсий адвокати Ричард Собернинг айтишича, гаражда сақланадиган шахсий ва сиёсий ҳужжатлар орасида Обама маъмуриятига оид бир қанча махфий ҳужжатлар бор. Гаражга туташ хонада ҳужжатнинг яна бир саҳифаси топилган. Ҳужжатларнинг мазмуни ҳақида адвокат ҳеч нарсани очиқламаган.