АҚШ давлат котиби Энтони Блинкен Россиянинг ядровий доктринасига президент Владимир Путин томонидан эълон қилинган ўзгаришларга изоҳ берди. Блинкен бу қарорни “масъулиятсизлик” деб атади.
“Бу мутлақо масъулиятсизлик. Ўйлайманки, у илгари ядро қуроли билан таҳдид қилганда, дунёда кўпчилик бу ҳақда гапирган, шу жумладан, Хитой ҳам. Айтишим керакки, ҳозир бутун дунё БМТ Бош ассамблеясига йиғилиб, кўпроқ қуролсизланиш зарурлигини эълон қилаётган пайтда бу ишни такрорлаш керак”, деди Энтони Блинкен.
Кеча, 25 сентябрь куни Владимир Путин раислигида Россия Хавфсизлик кенгашининг ядровий тўсиқ бўйича доимий йиғилиши бўлиб ўтди. Учрашувнинг асосий мавзуси охирги марта 2020 йилда янгиланган Россия ядровий доктринасига тузатишлар киритиш бўлди.
Янги ҳужжатга кўра, ҳар қандай ядрога эга бўлмаган давлатнинг Россияга ядровий қуролга эга давлат кўмагида тажовуз қилиши ҳужум деб ҳисобланади. Ҳарбий самолётлар, қанотли ракеталар ва дронларнинг оммавий ҳужуми ҳақидаги маълумотлар ядро қуролидан фойдаланишга асос бўлиши мумкин.
Президент матбуот котиби Дмитрий Песковнинг тушунтиришича, ядровий доктринага киритилган ўзгаришлар дўстона бўлмаган давлатларга Россияга ҳужумнинг мумкин бўлган оқибатлари ҳақида сигналдир. Шу билан бирга, Песков Россия Федерацияси ядро арсеналларини кўпайтиришни режалаштирмаётганини таъкидлади.
Изоҳ (0)