Федерал қидирув бюроси (ФҚБ) агентлари АҚШ собиқ президенти Дональд Трампнинг қароргоҳида ўтказилган тинтув чоғида, шу жумладан, ядро қуроли билан боғлиқ ҳужжатларни ҳам қидирган. Бу ҳақда The Washington Post ўз манбаларига таяниб хабар бермоқда.
Нашр суҳбатдошлари айнан қандай маълумотлар ФҚБ ходимларини қизиқтиргани ҳақидаги тафсилотларни келтирмаган. Шунингдек, улар ҳужжатларда тилга олинган ядро қуроли қайси давлатга тегишли эканини ҳам очиқламади. Ҳамда агентлар ушбу ҳужжатларни топган-топмагани ҳам номаълум.
Трампнинг вакили, АҚШ Адлия вазирлиги ва ФҚБ изоҳлардан бош тортди.
WP суҳбатлашган экспертлар фикрича, тинтувлар АҚШ ҳукумати мансабдорлари, гўёки, Трампда сақланаётган ва бегона қўлларга тушиб қолиши мумкин бўлган махфий ахборот юзасидан хавотир олаётганини билдиради.
Эслатиб ўтамиз, аввалроқ Дональд Трамп, Мар-а-Лагодаги қароргоҳида ўтказилган тинтувлардан кейин, ўзига қарши гувоҳлик беришдан бош тортган эди.
ФҚБ агентлари 8 август, душанба куни Трампнинг Флоридадаги Мар-а-Лаго қароргоҳида тинтув ўтказган эди. The New York Times вазиятдан хабардор манбаларига таяниб ёзишича, ФҚБ Трампнинг уйини у Оқ уйни тарк этганидан кейин ўзи билан олиб кетган ҳужжатлар туфайли тинтув қилмоқда. Ҳужжатларда махфий маълумотлар бўлиши мумкин.
Нашрга кўра, АҚШ миллий архиви «кўп ойлар давомида» 15 қути ҳужжатларни қайтаришни сўраган ва ушбу ҳужжатлар йўқ қилиниши эҳтимоли юзасидан ФҚБга мурожаат қилган. «Жаноб Трамп ўз президентлиги даврида ҳукумат архивларида сақланиши керак бўлган расмий қоғозларни йўқ қилиб ташлагани билан танилган», — деб ёзади газета.
Кейинроқ ҳужжатлар қайтарилган.
Трампнинг сўзларига кўра, агентлар тинтув чоғида ҳатто унинг сейфини ҳам бузиб очган. Собиқ президент ФҚБ хатти-ҳаракатларини сиёсий тусга эга деб атади. Унинг ишонч билдиришича, амалдаги президент Жо Байден ФҚБнинг тинтув ўтказиш ниятидан хабардор бўлган. Агар иш расман айблов эълон қилишгача бориб етса, Трамп 2024 йилги президентлик сайловига ўз номзодини қўйиш имкониятидан маҳрум бўлиши мумкин.
Трампга нисбатан яна бир иш 2021 йил 6 январда Капитолийда юз берган тартибсизликлар билан боғлиқ.
АҚШда аввалги президентлик сайловлари 2020 йилнинг ноябрь ойида бўлиб ўтган. Сайлов натижаларига кўра, Трамп 232 та, унинг рақиби Жо Байден 306 та овоз тўплаган. Байден овоз бериш адолатли ўтганини таъкидлайди.
2021 йилнинг январь ойи бошида Вакиллар палатаси сайлов натижаларини маъқуллайдиган куни Трамп тарафдорлари Вашингтонда митингга йиғилди. Намойишчилар Капитолийни эгаллаб олди, уларга қарши кўзни ёшлатувчи газ ва шовқинли гранаталардан фойдаланилди. Тўқнашувларда беш киши ҳалок бўлган. Байден Трампни зўравонликка ундаганликда айблади.
Изоҳ (0)