Супер юлдузнинг ўғли бўлиш жуда осон деб ўйларсиз: яхши таълим, фаровон ҳаёт, мухлислар муҳаббати ва бошқа ҳамма нарса етарли бўлади. Митҳун Чакрабортининг энг ёш меросхўри Намаши 30 ёшда, у ҳамон Болливуддаги дебютини кутмоқда. Актёр оила қурмаган ва шахсий карерасини қуришга ҳаракат қилмоқда.
Намашининг отаси Митҳун бутун бир авлоднинг тимсолига айланди. Унда ҳақиқий истеъдод, жозиба ва харизма бор эди. Бироқ Митҳуннинг ноёб истеъдоди учта ўғлига ҳам ўтмади. Намаши 1992 йилнинг 4 сентябрида Мумбайда туғилган, аммо болалигининг кўп қисмини Утида ўтказган.
Унинг феъл-атвори эмас, ташқи кўриниши отасига ўхшайди. Актёр болалигидан ота-онасининг изидан боришни ва фильмларда рол ўйнашни орзу қилади. Намаши Кишоре Намит Капур актёрлик мактабини ва Шиамак Давар рақс мактабини тамомлаган.
У 2013 йилда “Қаҳрамон” номли қисқа метражли фильмини суратга олди, сўнг акаси Мимоҳнинг “Севги дарёси” фильмида режиссёр ёрдамчиси бўлиб ишлади. Тўрт йил олдин Намаши ўзининг биринчи “Ёмон йигит” фильмини продюсер Сажид Қурешининг қизи дебютант Амрин Қуреши билан имзолади.
Фильм 2020 йилда экранларга чиқиши керак эди, бироқ пандемия туфайли лойиҳанинг чиқиши кечиктирилди. 2021 йилнинг кузида суратга олиш гуруҳи лойиҳани суратга олиш учун Санкт-Петербургга жўнаб кетди ва Митҳун Чакраборти ҳам ўғлини қўллаб-қувватлаш учун у ерга борган.
Намаши Instagram саҳифасидаги жонли эфирлардан бирида дебют фильми 2022 йилнинг июль ойида чиқишини маълум қилди, бироқ премера ҳали бўлиб ўтмади. Яқинда актёр иштирокидаги биринчи клип чиқди. Бу 30 ёшли йигитнинг карерасидаги ягона ютуғи.
Намашининг айтишича, у узоқ вақт давомида отасига актёр бўлишни хоҳлаётганини айта олмай юрган. “Дадамга фильмларда рол ўйнашни хоҳлаётганимни айтганимда (бу воқеа 2016 йилда содир бўлган), у бу ҳақда узоқ вақтдан бери билишини, Говинда ва Шоҳрух Хон ва ҳатто ўзининг қўшиқларига рақсга тушганимни кўрганини айтди.
Бироқ у менга Болливудда ёрдам бера олмаслигини ва биринчи фильмимни ўзим излашим кераклигини айтди ва 2019 йилда АҚШдаги таътилдан қайтгач, ишим йўқлигини англадим.
Орадан бир ҳафта ўтгач, кастингларга бора бошладим ва бунга жиддий киришдим”, — дейди актёр. Намаши “Ёмон йигит” фильми продюсери Сажид Қуреши билан шундай танишди. Продюсер янги лойиҳада қизи Амрин билан партнёрликда ишлайдиган, бош қаҳрамон ролини ижро этадиган актёрни қидираётган эди.
Режиссёр Ражкумар Сантоши ҳайрон бўлиб, “Мен Митҳун Чакрабортининг Мимодан бошқа ўғли борлигини билмасдим”, — деб айтган.
“Биз фотосессия ва бир нечта маҳорат дарсларини ўтказдик. Икки ярим ҳафта ўтгач, фильмда суратга тушиш учун шартномани имзоладим”, — дейди актёр.
Намаши бошқа дебютантлардан нимаси билан фарқ қилади, деган саволга у иккиланмасдан: “Менда ҳаётга қатъий муносабатим, истаган нарсамга эриша олишдаги қатъиятим, диққатни жамлаш қобилиятим ва фильмларга бўлган муҳаббатим бор. Мен фильмлар ҳақида ҳамма нарсани биламан. Фильмлар нафақат менинг ДНКъмда, балки том маънода танамнинг ҳар бир ҳужайрасида мавжуд. Мен ҳеч қачон фильмлардан зерикмайман.
“10 йил ичида иМДБ учун деярли 3000 та шарҳ ёздим. Мен фильмлар ҳақида ёзишни яхши кўраман ва бошқа ҳеч нарса ҳақида ўйлай олмайман. Шеърлар, ҳикоялар ёзишга ҳаракат қилдим, лекин натижадан қониқмадим. Мен кинода яшайман ва нафас оламан”, — дейди Намаши.
Намаши комплекслари борлигини ва ҳаётда у жуда оддий йигит эканини айтган. Актёрдан ўзининг асосий жиҳати нима, деб сўрашганида, у бу саволга: “Мен жингалак сочларимни яхши кўраман”, — деб жавоб берган.
Изоҳ (0)