Фильмни суратга олиш мураккаб жараён бўлиб, лойиҳанинг қанчалик муваффақиятли бўлиши кўплаб омилларга, жумладан, актёрлар таркиби, режиссёр маҳорати, сценарий, маркетинг кампанияси ва ҳатто танқидчиларнинг фикрларига боғлиқ.
Ушбу омилларга таянган ҳолда фильмнинг келажакдаги тақдирини юқори аниқлик билан башорат қилиш мумкиндек туюлади, аммо кино саноати кутилмаган ҳодисаларга бой. Шов-шувли рекламалар ва катта бюджетга эга баъзи картиналар жуда кам инсонларни жалб этиши, ёки аксинча, муваффақиятига ишонч билдирилмаган лойиҳалар энг кассабоп фильмларга айланиши мумкин.
“Юлдузлар жанги: IV эпизод: янги умид”
Бугунги кунда “Юлдузлар жанги” тарихидаги энг юқори даромад келтирувчи медиа франшизалар рўйхатида турибди. Аммо 1977 йилда барча ижодкорлар Жорж Лукаснинг ижод маҳсули омадли бўлишига шубҳа билан қараган эди.
20th Century Fox компанияси “Юлдузлар жанги” фильмининг премьераси учун бор-йўғи 40 та кинотеатрни брон қилган, чунки оддий томошабинга олисдаги галактика муаммоларини томоша қилиш қизиқ бўлмайди, деб ҳисоблаган.
Ҳатто режиссёр Жорж Лукас ҳам унинг муваффақиятига ишонмасди. Натижада “Янги умид” 20th Century Fox’ни банкротликдан қутқариб қолди, фильм ўша пайтда ақл бовар қилмайдиган 337 миллион доллар даромадга чиқди ва тарихдаги энг яхши франшизаларидан бири сифатида қолди.
“Титаник”
Бир вақтлар “Титаник” фильмининг муваффақиятсизликка учрашини деярли ҳар бир кино танқидчилари башорат қилган эди. Чунки фильмни суратга олиш ишлари учун харажатлар миқдори тобора ошиб борар, премьера санаси эса бир неча марта кечиктирилган эди.
Ўша даврда “Титаник”нинг бюджети ақл бовар қилмайдиган даражада — 200 миллион доллардан ортиқ эди, бу эса ҳақиқий Титаник кемасини қуриш нархидан ҳам кўпроқ эди. Кейинчалик фильмнинг тақдири барчамизга маълум: “Титаник” икки миллиарддан ортиқ касса тушумларини олиб келди, 15 ҳафта давомида кино кассаларида етакчиликни қўлдан бой бермади, 11 марта “Оскар” мукофотининг турли номинацияларида номзод бўлди ва кино тарихидаги энг ёрқин фильмлардан бири бўлиб қолди.
“Аватар”
“Титаник” фильмининг ажойиб муваффақиятидан сўнг режиссёр Жеймс Кемерон яна бир юқори даражадаги лойиҳа билан катта экранга қайтиш учун 12 йиллик танаффус олди. “Аватар” фильми экранларга чиқишидан аввал ҳам кўплаб танқидларга учради: фильм бюджетининг тобора ошиб бориши, танқидчиларнинг норозиликлари премьерага қадар давом этди. Бу сафар Кемерон аниқ қоқилади ва “Аватар” муваффақиятли бўлмайди, деган фикрлар баланд овозда таъкидланар эди. Бегона сайёрада ноодатий кўл тусли одамлар ва мавжудотлар ҳақидаги уч соатлик ҳикоя кимга ҳам қизиқ бўлиши мумкин?
Натижада эса “Аватар” жаҳон прокатида икки ярим миллиард доллардан кўпроқ даромад олиб келди ва Marvel оламининг “Финал” фильмигача энг юқори даромад келтирувчи фильм номини сақлаб қолди.
“Ибтидо”
2008 йилда Кристофер Нолан барча даврларнинг энг афсонавий комикс фильмларидан бирини яратди. “Қора рицар”дан кейин у таниқли режиссёрга айланди. Аммо Нолан Леонардо Ди Каприо иштирокидаги “Ибтидо” фильмини суратга олишни бошлаганида продюсерлар унинг ғоясидан жиддий ташвишлана бошлашди.
Онг остига саёҳатлар ҳақидаги фантастик драма томошабинларга манзур бўлмаслигига танқидчилар ишонар эди. Фантастик асарлар ёзувчиси Жейсон Сенфорд ҳам фильмнинг муваффақиятсиз бўлишини ҳамда Ноланнинг режиссёрлик карьераси барбод бўлишини башорат қилган эди. Аммо барчаси яхшилик билан якунланди. “Ибтидо” фильми нафақат 825 миллион доллар йиғди, балки саккиз карра “Оскар” мукофотига номзод бўлиб, тўртта олтин ҳайкалчани қўлга киритди.
Изоҳ (0)