Режиссёр Рустам Саъдиев 2019 йили «Барон 2» фильмининг илк тизерини намойиш этган эди. Кинематография агентлиги буюртмасига биноан суратга олинаётган фильм пандемия сабаб тўхтаб қолганди. Ниҳоят ижодкорлар кутган кун яқинлашди. «Барон-2. Соғинч» фильмининг асосий тақдимоти 15 сентябрь куни Тошкент халқаро кинофестивали доирасида бўлиб ўтади. Унда суратга тушган хориж киноижодкорлари ҳам ташриф буюриб, томошабинлар билан мулоқотда бўлишади.
Ундан аввал эса режиссёр Рустам Саъдиев оммавий ахборот воситалари ходимлари ва блогерлар учун ёпиқ премьера ўтказишни истади. «Дарё» мухбирлари ҳам ёпиқ тақдимотда иштирок этиб, фильм ижодкорлари билан суҳбатда бўлди.
«Барон-2. Соғинч» бадиий фильми террористик интервенсияни фош қилувчи, ички механизмларни очиб берувчи ўткир сюжетли драма бўлиб, унда мураккаб трюклар, экшн ва оммавий саҳналар, пиротехник воситалар ёрдамида қўпорувчилик эпизодлари тасвирланади.
Фильмда нафақат ўзбек, балки Туркия, Қозоғистон, Тожикистон, Сурия, Миср, Россиянинг актёр ва актрисалар ҳам суратга тушган. Фарҳод Маҳмудов, Бахшилло Фатхуллаев, Ғайрат Боймирзаев, Юлдуз Ражабова, Дилноза Кубаева, Элёр Маҳкамов, Шаҳзода Матчонова, Нурмуҳаммад Ҳусниддинов, Сергей Астахов, Виктория Толстоганова, Виктор Вержбиский, Игорь Лифанов, Константин Соловёв, Тауккел Муссилим, Амир Таиров, Каан Урганжиўғли, Сефа Зенгин иштирок этган.
Кинематография агентлиги директорининг биринчи ўринбосари Шуҳрат Ризаев ҳам ёпиқ премьерада иштирок этиб, журналистларни яқин кунларда ўтказиладиган «Миллий кинофильмлар ойлиги» ва халқаро кинофестиваль ҳақида маълумот бериб ўтди.
Премьерага «Миллион» жамоаси сардори Даврон Кабулов бошловчилик қилди.
Бу мураккаб фильм. Унинг ташкилий ишлари учун ҳам анча вақт сарфладик. Рухсат олиб, съёмкаларни бошлаймиз деганимизда карантин бошланиб, чегаралар ёпилди. Шу боис суратга олиш ишлари бир йилга сурилди. Очиғини айтиш керак, бу фильм менга жуда оғир келди. Суратга олиш ишларининг чўзилиши сабаб соғлиғимни ҳам яхшигина йўқотдим. Тўғриси, фильмнинг премьера қилинишига ишонмай ҳам қўйгандим. Чунки фильмга нисбатан ишончсизлик кўп бўлди. Кинематография агентлигининг бадиий кенгаши кўпгина кўрсатмалар бериб, фильмни янада созлашди. Аввалдан «Барон» фильми трилогия бўлишини режа қилганман. Насиб қилса, унинг давоми ҳам бўлади, — дейди режиссёр Рустам Саъдиев.
Тўғрисини айтсам, премьерадан умидимни ҳам узиб қўйгандим. Чунки фильм 4 йил деганда катта экранга чиқди. Фильмда Виктория Толстоганованинг иштирокини кўриб жуда севиндим. У энг яхши кўрган актрисаларимдан бири.Аввалига режиссёрга озгина қайсарлик қилдим. Чунки фильмда яна асосий қаҳрамоннинг аёли ролини ижро этдим. Эпизодларим ҳам у қадар кўп эмас. Рустам акага: «Қачон яна «бомба» бўладиган ролларни берасиз?» дедим. Рустам ака «Бу ролни сиз ижро этмасангиз бўлмайди, бароннинг аёли жуда катта аҳамиятга эга», деб сеҳрли каломларини ишга солганларидан кейин қандай рози бўлганимни ҳам билмай қолдим, — дейди актриса Дилноза Кубаева.
«Барон-2. Соғинч» фильмини халқаро миқёсда суратга олинган фильм дейиш мумкин. Чунки ундаги воқеалар Ўзбекистон, Россия, Сурия ва Швейцария каби мамлакатларда суратга олинган. Кадрларнинг ранг-баранглиги томошабинни сюжет ичига олиб киролади.
Юқорида айтиб ўтганимиздек, актёрлар ҳам ранг-баранг. Масалан, Юлдуз Ражабова ижро этган Наргиза ролига қозоғистонлик актёр Тауккел Муслим мос партнёр сифатида танланган.
Интернетдаги танишув сабаб Суриядаги уруш ўчоғига бориб қолган ўзбекистонлик Наргиза унга тегажоғлик қилмоқчи бўлган «каттакон»га қўпол муомала қилгани учун қамоққа олинади. Қозоғистонлик Булат уни қамоқхонада кўриб қолади ва онасининг ҳам ўзбек диёридан эканлиги учун қизга ёрдам бермоқчи бўлади. У командирдан қамоқдаги ўзбек қизига уйланиш нияти борлигини айтади. Аммо бу қарор Наргизага ёқмайди. У никоҳ ўқилгач, йигитни ўлдирмоқчи бўлади. Аммо йигит унга шунчаки ёрдам бериш ниятида эканлигини айтади. Аввалига унга душмандек қараган Наргиза аста-секин йигитга кўнгил қўяди. Булат образи орқали режиссёр оилапарвар, мард йигит ролини ишонарли очиб беролган.
Албатта, ютуқ камчиликлардан холи бўлмайди. Ишда бор жойда камчиликнинг бўлиши ҳам табиий ҳол. Фильм воқеалари Барон лақабли махсус хизмат ходимига қурилиши керак. Аммо Барон билан боғлиқ воқеалар у қадар таъсирли эмас ёки тушунарсиз. Шу сабабдан фильмнинг аввалги ярим соатида кўпчиликка зерикарлидек туюлди.
Рустам Саъдиев актёрлар танловига алоҳида эътибор берадиган ва гонорардан «қочмайдиган» режиссёр ҳисобланади. Аммо баъзи актёрларни ролга атайин «елим»лагани яққол сезилиб қолган. Бассамнинг ўғли, махсус хизмат операцияси генерали шулар жумласидан.
Фильм премьераси 18 августдан бошлаб нафақат Ўзбекистонда, балки Россияда ҳам намойиш этилади. Шу боис у рус тилида ҳам дубляж қилинди. Фильм саундтрекини Ўзбекистонда хизмат кўрсатган артист Ҳосила Раҳимова ижро этди.
Мавзуга доир:
- Рустам Саъдиев 85 фоиз роллар жаҳон киноюлдузлари томонидан ижро этилган «Барон 2» фильми қачон премьера қилиниши ҳақида (видео)
- «90 фоизи бир тийинга қиммат». Режиссёр Рустам Саъдиев ҳозирги ўзбек сериаллари ҳақида (видео)
- Каан Урганжиўғли, Сатоко Акио, Павел Прилучний ва ўзбек фильмларида суратга тушган бошқа хорижий актёрлар (фото, видео)
Изоҳ (0)