АҚШнинг Сан Диего шаҳрида Comic-Con 2024 фестивали доирасида Marvel оламининг янги фильми тақдимоти бўлиб ўтди. Бу ҳақда Europa plus нашри хабар берди.
Фестиваль ташриф буюрувчиларини катта сюрприз кутаётган эди. Marvel Studios президенти Кевин Файги “Қасоскорлар” фильминининг кейинги қисмини суратга олиш учун ака-ука режиссёрлар Энтони ва Жо Руссо Marvel оламига қайтишларини эълон қилди. Шунингдек, режиссёрлар яқинлашиб келаётган дилогиянинг асосий ёвуз қаҳрамони — Доктор Дум образини тақдим этди. Мазкур қаҳрамон костюмини кийган ҳолда саҳнада турган шахслардан бири ниқобини ечганда, унинг остида Кичик Роберт Дауни экани мухлисларни ҳайратга солди.
“Янги ниқоб бу — эски вазифа. Мен сизга мураккаб қаҳрамонларни ўйнашни яхши кўраман, дегандим-ку”, дея нутқини бошлади Роберт Дауни.
Актёрнинг супер қаҳрамонлар ҳақидаги франшизага қайтиши ҳақидаги хабарни кўплаб кино ихлосмандлари ижобий тарзда кутиб олди. “Қасоскорлар: қиёмат куни” ва “Қасоскорлар: яширин урушлар” номли янги фильмларда актёр даҳшатли Доктор Дум ролини ижро этади.
Аммо Роберт Даунининг франшизага қайтиши Marvel Studios компаниясига жуда қимматга тушди. Студия режиссёрларга 80 миллион доллар тўлайди. Робертнинг гонорари эса уларникидан “сезиларли даражада юқори“ бўлади, дейилади хорижий манбаларда. Бу кўрсаткич Marvel учун янги рекорддир.
Кичик Роберт Даунини янги қиёфада кўриш 2026 йилда насиб этади. “Қасоскорлар” бешинчи қисмининг премьера санаси ҳозирча маълум қилинмаган.
Изоҳ (0)