Машҳур боксчи йигит кўчада тўлғоғи тутган аёлга ёрдам бериш учун уни туғуруқхонага олиб боради. Аммо шу кундан эътиборан унинг ҳаёти бутунлай ўзгариб кетади. Чунки аёл фарзандини боксчи йигитга ташлаб кетади. Тўйи бўлиш арафасидаги йигит гап-сўзлардан қўрқиб, чақалоқ ҳақида яқинларига айтмади. Аммо уни ташлаб кетишга ҳам кўзи қиймайди.Бу воқеалар сизга «Дада» фильмини эслатди, тўғрими? Бу йил мазкур картина суратга олинганига 12 йил тўлди. Фильм 2010 йилнинг июль ойида илк марта премьера қилинган эди. Шу муносабат билан «Дарё» мухбири Наргизахон Муродова фильм ижодкорлари билан боғланиб, «Дада»нинг суратга олиниши билан боғлиқ қизиқарли воқеалар ҳақида суҳбатлашди.
«Дада» фильмида Улуғбек Қодиров, Муҳаббат Эргашева, Матёқуб Матчонов, Нодира Қодирова, Нигора Каримбоева, Аҳрор Маҳмудов, Абдирайим Абдуваҳобов, Азиза Бекматова, Ўткир Мелиев, Зуҳра Солиева каби истеъдодли актёрлар жамоаси суратга тушган.
Абдувоҳид Ғаниев — фильм режиссёри
— «Паноҳ» фильмининг суратга олиш вақтида талабалар ётоқхонасида узоқ йиллардан буён ишлайдиган қоровул билан суҳбатлашиб қолганман. У талаба қизларнинг бири тўй кўрмай, ҳомиладор бўлгани ва фарзандини ташлаб кетгани ҳақида айтиб қолди. Бундан мазмундаги фильмлар аввал ҳам яратилгани учун бошқачароқ тарзда фильм олгим келди. Яъни ташлаб кетилган боланинг тақдири қандай бўлади, деган саволга жавоб бермоқчи бўлдим. Шоира Ғиёсова ва Акром Маҳкамовлар билан маслаҳатлашиб, сценарий ёзганмиз.
Зафар роли учун кўп номзодлар бўлган. Аввалига Улуғбек Қодировни олишга иккиланиб турганмиз. Чунки Зафар боксчи йигит бўлиши, рингдаги хатти-ҳаракатлари кўрсатилиши керак эди. Аммо у вақтда Улуғбек яхшигина вазн тўплаганди. Тан бериш керак, Улуғбек 15 кунда озиб, спорт формасига кирган.Суратга олиш майдончасида қийинчиликлар жуда кўп бўлган. Чунки 6 ойлик чақалоқ билан ишлаш осон эмас. Олти ойлик болакай инжиқланиши, кутилмаганда ухлаб қолиши ёки тинмай йиғлаши мумкин. Улуғбек Қодиров у вақтда ҳали фарзандли бўлмаганди. Чақалоқни чўмилтириш, таглигини алмаштириш билан боғлиқ кадрларда роса қийналганди, — дейди фильм режиссёри Абдувоҳид Ғаниев.
Режиссёр «Дада» фильмида кичкина Зафар ролини ижро этган Беҳруз Ғуломовнинг бугунги ҳаёти ва қизиқишлари қандай эканлигини билишни исташиши айтди.
— Аниқ эсимда, у бола фильм суратга олинган вақтда олти ой эди. Орадан анча йил ўтиб, қайсидир фильмнинг премьерасида «Ўзбеккино»нинг собиқ раҳбари Аъзам Исоқов уни саҳнада таништирганди. У 5 ёшни қаршилаб, ширингина болакай бўлганди. «Дада» фильмини кўрганда шу болакайнинг бугунги ҳаёти, қизиқишлари қандай экан деб ўйлайман. У биз билан боғлиқ воқеаларни эслолмаслиги табиий ҳол. Аммо у билан бизнинг ширин хотираларимиз бор, — дейди режиссёр.
Бу режиссёр бир неча йилдан буён АҚШда истиқомат қиляпти. Ижодкор бунинг сабабини қуйидагича изоҳлади.
— Айримлар ўйлагандек, Ўзбекистондан ёки ижоддан кетганим йўқ. Катта қизим АҚШдаги университетда ўқийди. Шу боис оилам билан АҚШга кўчиб келганмиз. Аммо вақти-вақти билан Ўзбекистонга бориб, фильмлар суратга оляпмиз. Ўтган йили борганимда ҳам қорақалпоқ ижодкорлари билан ҳужжатли фильм суратга олдим. Океан ортида ҳам ижод билан бандман. Реклама роликлари суратга оламиз. Ҳозирги кунда эса Голливуд продюсерлари билан ҳамкорликни йўлга қўймоқчиман. АҚШда ўзимни худди талабадек ҳис қиламан, чунки бу ерга келиб жуда кўп нарсаларни ўргандим, — дейди режиссёр Абдувоҳид Ғаниев.
Аҳрор Маҳмудов — актёр:
— «Дада» фильми билан боғлиқ қизиқарли воқеалар жуда кўп. Масалан, Зафар келинбола билан тўй кўйлагини кўргани кўргани борганида менинг қаҳрамоним чақалоқ билан машинада ўтириб туради. Ўша пайтда ҳаво бугунгидек жуда иссиқ эди. Қўлимдаги бола йиғлайвериб, қизариб кетганди. Уни овутолмай қийналиб кетганмиз. Болакайнинг онаси ҳам қийналиб кетган. «Стоп» дейилиши билан югуриб келиб, болани қўлимиздан оларди, — дейди актёр Аҳрор Маҳмудов.
Муҳаббат Эргашева — актриса:
— Бу фильмга Абдувоҳид Ғаниевнинг устози Рустам Саъдиев таклиф этганди. Кастинг топширгач, ролга тасдиқлашган. Суратга олиш майдончасида жуда кўп қизиқарли воқеалар бўлган. Масалан, Улуғбек акани ит қувлаган саҳнаси олинаётганда ўргатилган ит ҳақиқатан ҳам уни қувиб кетган. Актёрга тан-жароҳатини етказмасин деб, итнинг ортидан яна 3-4 киши югуришган. Кейин Улуғбек Қодиров билан кечаси томга чиқиб, шаҳар манзарасини томоша қиладиган саҳнамиз бор. Улуғбек ака тасодифан оёғимни босиб олган. У кишининг қанчалик гавдали эканлигини яхши биласиз? Оёғим оғриб, бир ҳафтагача чўлоқланиб юрганман, — дейди актриса Муҳаббат Эргашева.
«Дада» фильмини кўрган кишида кичкина Зафар қандай йигит бўлган экан, деган савол туғилиши табиий ҳол. Чунки ўзбек киносида чақалоқ бош ролни ижро этган фильмлар жуда кам. Шу боис Беҳруз Ғуломов ва унинг оила аъзоларини излашга қарор қилдик.
Мана бу уйни танидингизми? Бу ерда «Дада» фильми суратга олинган. Тўғри, 12 йил давомида у бироз ўзгарган. Аммо актёр Улуғбек Қодировнинг қаҳрамони яшаган болахона сақлаб қолинган.
— Фильм ижодкорларига уйимиз маъқул келган. Унгача кўпчилик оилалар ойлик чақалоқларини фильмда суратга тушишига рози бўлишмаган экан. Биздан сўрашганида қарши бўлмадик. Адашмасам, суратга олиш жараёнлари тахминан бир ой давом этганди. Ўғлим вазмин бўлгани учун ижодкорларни деярли қийнамаган. Қорни тўқ, уйқуси яхши бўлган бўлса, кадрга кулиб суратга тушиб берарди.
Ўғлим Беҳруз Ғуломов пойтахтдаги 94-мактабда таҳсил олади. Футболни жуда яхши кўради. Актёрликка қизиқмайди, аммо ўзи суратга тушган «Дада» фильмини кўп марта томоша қилган. «Шунақа бўлганманми?» деб саволларни қалаштириб ташлайди. Тарихда қоладиган фильм яратилган, унга ўз ҳиссамизни қўшганимиздан жуда хурсандмиз, — дейди Беҳруз Ғуломовнинг онаси Камола Ғуломова.
Беҳруз Ғуломовдан санъатга қизиқиши ва дўстлари у суратга тушган фильм ҳақида қандай фикрда эканлиги ҳақида сўрадик.
— Кўпчилик кинода суратга тушганимни билишади. Аммо мен бу ҳақида гапиришга уяламан. Аммо кинони жуда мақташади. Актёрликка эмас, футболга қизиқаман. Яқинда ҳам қўлимдан жароҳат олдим. Аммо барибир футбол энг қизиқарли спорт тури, — дейди Беҳруз Ғуломов.
Мавзуга доир:
- «Опа-сингиллар» 10 ёшда: сериал қандай суратга олинган? Бош қаҳрамонлар ҳозир қандай кўринишда ва нима билан банд?
- Бир фильмда иккита қаҳрамонни маҳорат билан ижро этган ўзбекистонлик актёр ва актрисалар (видео)
- Фото: 90 йилларда машҳур бўлган «Ёлғон асираси» сериали қаҳрамонлари 22 йилдан кейин
- «Сардор» сериали қаҳрамонлари 21 йилдан сўнг қанчалар ўзгарган ва улар қандай ишлар билан банд (фото ва видео)
Изоҳ (0)