“Қизларим учун энг ёмон одамга айланганман”: Эмили Блант фарзандларининг “Қаттиққўл хоним” фильмига муносабати ҳақида сўзлаб берди

Актриса Эмили Блант Page Six нашрига берган интервьюсида қизларининг “Қаттиққўл хоним” фильмига муносабати ҳақида сўзлаб берди. Актрисанинг фарзандлари машҳур фильмни томоша қилгач, онаси гавдалантирган қаҳрамонни “дунёдаги энг ёмон одам” деб атаган.

Ўн ёшли Ҳейзел ва етти ёшли Ваёлет исмли қизлар Блантнинг ижросидан шунчалик таъсирланганки, улар онасини (аниқроғи, фильмдаги қаҳрамонни) “ҳаётида учратган энг ёмон одам” деб атаган.

Podium номли мода журнали бош муҳаррири Миранда Пристлининг (актриса Мерил Стрип) ёрдамчиси образи Эмили Блант карьерасидаги биринчи катта роли эди. Актрисанинг айтишича, унинг қаҳрамони одамлар қалбида шунчалик катта таассурот қолдиришини тасаввур ҳам қила олмаган:

“Фильмдаги образимдан менга қараб иқтибос келтирадиган инсонларни ҳалигача учратаман”, деди актриса.

Шунингдек, Эмили Блант машҳур актрисалар — Мерил Стрип ва Энн Ҳетеуэй каби юлдузлар билан биргаликда ишлагандан мамнун экани ҳамда фильм суратга олиш майдонида улар билан ажойиб вақт ўтказганини қўшимча қилди:

“Ўшанда мен ёш эдим, бу менинг иштирокимдаги биринчи катта фильм эди. Ёдимда, агентим менга қўнғироқ қилиб, дам олиш кунлари премьера бўлиб ўтиши ҳақида хабар берган эди. Ичимда бу яхшими, деб ўйлаган эдим. Худди бу ҳодиса ажойиб эканлигини билмагандек”, дея эслайди Блант.

Лорен Вайсбергернинг “Prada кийган иблис” номли китоби асосида режиссёр Девид Фрэнкэл томонидан суратга олинган “Қаттиққўл хоним” фильми 2006 йилда экран юзини кўрган. Лойиҳа Мерил Стрипга комедия жанридаги энг яхши актриса роли учун “Олтин глобус” мукофотини ва бош рол учун “Энг яхши актриса” номинацияда “Оскар” мукофотини олиб келган. 35 миллион долларлик бюджет билан фильм 326 миллион доллар даромад келтирган.

Яқинда Disney компанияси “Қаттиққўл хоним” фильмининг давомини суратга олиши маълум бўлди. Фильмда қатъий ва талабчан раҳбар, бош муҳаррир Миранда Пристли ролини ўйнаган актриса Мерил Стрип ва мода журнали ходими образини гавдалантирган Эмили Блант ўз ролларига қайтиши мумкин. Актрисалар ҳозирча суратга олиш шартномасини имзоламаган. Лойиҳа эса ишлаб чиқаришнинг дастлабки босқичида. Фильмнинг давоми бўйича музокаралар режиссёр Девид Фрэнкэл ҳамда сценарий муаллифи Алин Брош Маккенна томонидан олиб борилмоқда.