18 октябрь куни Буюк Британия пойтахти Лондон шаҳрида III халқаро “Ўзбекистонлик” форуми ўтказилди. Унда “Ўзбекистонлик” фильмининг 4-эпизоди премьераси бўлиб ўтди.
Форумда бутун дунёдан келган 200 дан зиёд ўзбекистонлик ватандошлар, Ўзбекистондан ташриф буюрган делегатлар, шунингдек, Буюк Британиядаги нуфузли шахслар, бизнесменлар, дипломатлар ва жамоат арбоблари иштирок этди. Тадбирни ўз кириш нутқи билан Ўзбекистон Республикасининг Буюк Британиядаги Муваққат ишлар вакили Бахтиёр Ходжаев ва Европа тикланиш ва тараққиёт банки (ЕТТБ) президенти Одиль Рено-Бассо очиб берди.
“Ўзбекистонлик” форумларининг мақсади – бутун дунё бўйлаб ёйилган ўзбекистонликлар ўртасида глобал нетворкингни йўлга қўйиш ва Ўзбекистонни интеллектуал, истеъдодли ва меҳнаткаш инсонлар мамлакати сифатида тараннум этиш. Uzbekistan‘s club ижодий жамоаси томонидан ташкил этиладиган халқаро “Ўзбекистонлик” форумлари аввалроқ Берлин (Германия) ва Париж (Франция) шаҳарларида муваффақият билан бўлиб ўтган эди.
Форумнинг асосий воқеаларидан бири айни номдаги “Ўзбекистонлик” фильмнинг 4-эпизоди премьераси бўлди. Юз минглаб томошабинларнинг меҳрини қозониб улгурган бадиий-ҳужжатли фильмлар туркуми ўз соҳасида оламшумул натижаларга эришган ватандошларимизнинг ҳикояларини сўзлаб беришда давом этмоқда. Янги, бу сафарги эпизод қаҳрамонлари Европа тикланиш ва тараққиёт банки директори Камола Маҳмудова ва Кембриж университети биологи, фан доктори Темур Юнусовлар бўлди. Фильм Ёутубе тармоғи ва MY5 телеканали орқали 19 октябрь куни премьера қилинди.
Ҳар икки қаҳрамон оддий оиладан чиққан ва тенгдошларига нисбатан оғир болаликни бошдан кечирган. Бироқ бу уларнинг ўзлари орзу қилган марралардан чекинтира олмагани фильмда таъсирчан очиб берилган.
24 йилдан буён Европа тикланиш ва тараққиёт банкида фаолият кўрсатаётган Камола Маҳмудова таржимонликдан қандай қилиб банк соҳасига келиб қолгани, бу йўлдаги қийинчиликлар ва тўсиқларни қандай енгиб ўтгани, томошабинга катта мотивация беради.
“Мен қилолмайдиган ҳеч қандай вазифа йўқ, мен барчасини уддалай оламан. Чегаралар эса фақат миямизда холос”, — дея таъкидлайди у.
Бухоролик Темур Юнусовнинг биология фанига бўлган қизиқиши ва орзулари ота-онаси томонидан қўллаб-қувватланмаган. Шундай бўлса-да, у ўз орзулари ва мақсадларидан воз кечмади.
Ҳар икки қаҳрамонни боғлаб турадиган энг муҳим жиҳат — уларнинг ўзбекистонлик экани ва ўз Ватанига бўлган муҳаббати.
“Мен Лондонда яшасам ҳам унинг келажаги ҳақида ўйламайман, уни ўйлайдиганлар бор. Менга Ўзбекистоннинг келажаги муҳим. У ерда ота-онам, яқинларим яшайди. Қўлимдан келса, нега ёрдам бермаслигим керак?”, — дейди Темур.
“Сквер”даги дарахтлар кесиб ташланган кун ҳаётимдаги энг қора кунлардан бири, — дейди Камола Маҳмудова. — Худди мени машина уриб кетгандек бўлганман. Ахир дарахтлар болаларимизнинг мулки. Унга тегишга ҳаққимиз йўқ. Ҳар битта кесилган дарахт — болаларимизнинг соғлиғининг бир парчаси кетди, дегани”.
Фильмда, шунингдек, қаҳрамонларнинг экологик муаммолар, табиат, иқлим ўзгаришлари ва бошқа масалаларга оид фикрлари билан танишасиз.
“Биз глобал дунёда яшаяпмиз. Бу бегонанинг муаммоси деган тушунча қолмади, дегани. Хитойдан чиққан вирус бизни ўлдиради, Америкадан чиқаётган заҳарли тутунлар бизни куйдиради. Яъни муаммо — ҳаммамизники. Бундай муаммолар фақат Ўзбекистон ёки қайсидир мамлакатда эмас, бутун дунёда сезилади. Ўзбекистондан бошқа давлатга қочиб бу муаммодан қутула олмайсиз.
Келинг, ўз уйимизни саранжом қилайлик. Иқлим ўзгариши муаммоларига қарши курашиш учун ҳар бир одам камроқ истеъмол қилиши лозим. Масалан, сизга иккита кўйлак керак бўлса, ўнта олманг, ярмини олинг. Бу дегани ярмига кетадиган пахта ва бу пахтага кетадиган сув тежалди, дегани. Бирор манзилга машинада эмас, метрода боринг. Шунда сиздан қоладиган карбонат ангидрид камаяди. Ҳаммаси шундан келиб чиқади. Ҳар битта танловнинг қиймати бор. Унинг қийматини болаларимиз тўлайди. Уларга ўз қарзингизни қолдирмоқчимисиз?”, — дейди Темур Юнусов.
Изоҳ (0)