Испаниялик футболчи Андрес Иньеста буцаларини михга илганини эълон қилди.
40 ёшли Андрес фаолияти давомида “Барселона”, “Виссел Кобе” ва “Эмирейтс” клублари шарафини ҳимоя қилган. Фаолиятининг асосий йилларини (2001 йилдан 2018 йилгача) “Барселона”да ўтказган Иньестанинг 8 та энг яхши воқеани ёдга оламиз.
“Ла Масия”
1996 йил сентябрь. Иньеста “Барселона” академиясига қабул қилинади. “Альбасете”даги ўйинлари орқали кўзга ташланган йигитча дарҳол Каталонияга олиб кетилади.
Чемпионлар Лигасидаги дебют
2002 йил 29 октябрь. Андрес “Барселона” сафидаги дебютини ўтказади. Футболчининг илк ўйини Чемпионлар Лигаси доирасида “Брюгге”га қарши кечади. Рикельменинг голи “кўк-анорранглилар”га муҳим ғалабани олиб келади.
Примерадаги премьера
2002 йил 21 декабрь. Луи ван Гал 18 ёшли Иньестани “Мальорка”га қарши ўйиннинг асосий таркибига қўяди. Испаниялик футболчи ёмон ўйин ўтказмади ва жамоаси 4:0 ҳисобида зафар қучди.
Терма жамоадаги илк ўйин
2006 йил 15 май. Испания термасидаги илк ўйинга навбат келди. Россияга қарши кечган ўйин 0:0 ҳисобидаги дуранг билан якунланди.
“Челси”га урилган муҳим гол
2009 йил 6 май. “Барселона” Чемпионлар Лигасининг ярим финалида “Челси”га қарши ҳал қилувчи ўйинни ўтказган. Ўйин охирроғида Иньеста муҳим голни урди ва жамоасини финалга олиб чиқди.
2010 йилги Жаҳон Чемпионати финали
2010 йил 11 июль. Испания ва Нидерландия мундиал финалида ўзаро тўқнаш келди. Иньеста қўшимча бўлимларда гол уриб, жамоасига чемпионлик титулини олиб келди. У голни вафот этган дўсти хотирасига бағишлади ва финалнинг энг яхши ўйинчиси совринини қўлга киритди.
“Олтин тўп”га бир қадам
2011 йил 10 январь. Мундиалдаги муваффақиятдан сўнг Андрес “Олтин тўп”га номзодлар қаторидан жой олди. Якунда эса у иккинчи ўринни қўлга киритди. Соврин эса клубдаги жамоадоши Лео Мессига топширилди.
Евротриумф
2012 йил 1 июль. Жаҳон Чемпионатидаги ғалабадан 2 йил ўтиб, Испания яна бир совринни қўлга киритди. Киевдаги Евро—2012 финалида испанияликлар Италияни 4:0 ҳисобида мағлуб этди. Ўйинда ҳеч бир голли вазиятларда иштирок этмаган бўлса-да, якунда Иньеста финалнинг энг яхши ўйинчиси бўлди. Шундан сўнг бутун турнирнинг энг яхшиси дея ҳам эътироф этилди. Ўша йили Андрес УЕФА талқинига кўра Европанинг энг яхши футболчиси совринини қўлга киритди.
2018 йилда эса Андрес қадрдон жамоаси “Барселона”ни тарк этиб, фаолиятини Япониянинг “Виссел Кобе” клубида давом эттирди. 2023 йилда эса “Эмирейтс” сафига бориб қўшилиб, у ердаги 1 йиллик фаолиятдан сўнг буцаларини михга илганини эълон қилди. Шу тариқа яна бир маэстро футбол билан хайрлашди.
Изоҳ (0)