Warner Bros. компанияси “Тахтлар ўйини” сериали асосида янги фильм ишлаб чиқаради, дея хабар бермоқда Lifehacker нашри.
Ҳозирда тўлиқ метражли фильм ишлаб чиқаришнинг дастлабки босқичида, шунинг учун унга маълум бир режиссёр ва сценарий муаллифи бириктирилмаган. Манбаларда мазкур лойиҳа ҳақида бошқа тафсилотлар ҳозирча йўқ.
“Тахтлар ўйини” сериали HBO телеканалида 2011 йилдан 2019 йилгача намойиш этилган. Сериал Жорж Р.Р. Мартиннинг “Муз ва олов қўшиғи” (“A Song of Ice and Fire”) романи ва романлар туркумига асосланган.
“Тахтлар ўйини” XXI аср Америка телевидениесидаги энг катта бюджетга эга бўлган фентези жанрдаги қимматбаҳо лойиҳа бўлиб, у кўплаб мукофотларга сазовор бўлди. Жумладан, сериал 59 карра Эмми мукофотини олди.
Сериал саккиз фасл давом этди ва кино саноатидаги ҳақиқий феноменга айланди. Лойиҳанинг якуни баҳсли ва мунозарали бўлганига қарамай, “Тахтлар ўйини” муваффақияти камаймади ва унинг асосида бир нечта спин-оффлар, хусусан, “Аждар уйи” ва “Етти қироллик рицари” каби приквеллар суратга олинди.
“Аждар уйи”да Педди Консидайн, Эмма Д’Арси, Оливия Кук, Метт Смит ва бошқалар рол ижро этган. Картинага “Тахтлар ўйини”нинг бир нечта эпизодини тасвирга олган Мигел Сапочник ижрочи продюсер сифатида иштирок этган.
Изоҳ (0)