Heritage Аuctions Американинг HBO номли пулли телевизион тармоғи билан ҳамкорликда “Тахтлар ўйини” фильмига бағишланган кимошди савдоси ўтказди. Аукционда 4,5 мингга яқин киши қатнашди. Унда 900 дан ортиқ реквизитлар кимошди савдосига қўйилди ва умумий тушум 21 миллион долларни ташкил этди.
Фильмдаги машҳур детал — пластикдан ясалган ва темир билан қопланган тахт савдодаги энг қиммат лот бўлди. Олти дақиқа давом этган савдодан сўнг реквизит 1,49 миллион долларга сотилди. “Тахтлар ўйини” фантастик сериал қаҳрамонлари саккиз фасл давомида куч-қудрат рамзи бўлган мазкур тахт учун курашиб келган.
Бундан ташқари, кимошди савдосида Жон Сноунинг қиличи 400 минг долларга, совути эса 337,5 минг долларга сотилди.
Жейм Ланнистернинг аслаҳалари, Серсеянинг костюми, Санса ва Арья Старкнинг кийимлари, шунингдек, франшизадаги интерьер буюмлар, аждаҳонинг бош суяги каби предметлар ҳам аукционда сотувга қўйилди. Дейенерис Таргариеннинг кулранг чарм костюми эса 112,5 минг долларга сотилди.
Кимошди савдо ташкилотчиларининг сўзларига кўра, аукционда реквизитларнинг фақатгина асл нусхаси сотувга қўйилган. Уларнинг баридан “Тахтлар ўйини”ни суратга олиш жараёнида фойдаланилган.
Heritage Аuctions вице-президенти Жо Маддаленанинг айтишича, мазкур аукцион кўплаб шов-шувларга сабаб бўлишини у аввалдан билган:
“Барча лотлар Эмми мукофотига сазовор бўлган иқтидорли дизайнерлар томонидан яратилган. Улар Жорж Мартиннинг ажойиб романини кинога мослаштириш учун тинимсиз меҳнат қилишган. Аукцион иштирокчилари эса “Тахтлар ўйини” асарининг сеҳрли дунёсидан бир бўлакни ўзида сақлашни истаган ашаддий мухлислардир”, деди у.
Изоҳ (0)