Фильмларда ашаддий душман бўлса-да, реал ҳаётда қадрдон дўст бўлган актёрлар

Мазкур актёрлар фильмларда ўзаро душманлар ролини моҳирлик билан ўйнаса-да, аммо ҳақиқий ҳаётда уларни ҳавас қиларли дўстлик ришталари боғлайди.

Том Фелтон ва Руперт Гринт

Актёрлар Руперт Гринт ва Том Фелтон Гарри Поттер оламида қанчалик ашаддий душман бўлса, реал ҳаётда шунчалик қадрдон дўстдир. Драко Малфой ва Рон Уизли роллари ижрочилари кўпинча Лас-Вегасдаги кечаларда бирга иштирок этишади. “Маймунлар сайёрасининг юксалиши” премьерасида Гринт дўстини ҳазил билан қўллаб-қувватлаш учун “Том Фелтонни яхши кўраман” ёзувли кўйлак кийиб келган.

Фелтон Гарри Поттер фильмидаги бошқа дўстлари билан ҳам тез-тез учрашиб туради. Қизиғи, у фильмдаги қаҳрамонига ёқмаганлар билан дўст — айниқса Эмма Уотсон (Гермиона), Меттью Льюис (Невилл), Жеймс ва Оливер Фелпс (эгизак Уизлилар)лар билан қадрдон.

Эндрю Скотт ва Бенедикт Камбербэтч

BBC’нинг “Шерлок” сериалида Бенедикт Камбербэтч маслаҳатчи детектив Шерлок Ҳолмсни, Эндрю Скотт эса унга қарама-қарши ёвуз қаҳрамон Жеймс Мориартини ўйнайди. Улар ашаддий душманлар, бир-бирисиз чидаб бўлмас даражада зерикадиган иккита ажойиб даҳо.

Саҳна ортида эса актёрлар дўст — Скотт ҳатто 2015 йилда Камбербэтч ва Софи Ҳантернинг тўй маросимида ҳам қатнашган.

Крис Ҳемсворт ва Том Ҳидлстон

Marvel фильмларида Крис Ҳемсворт ва Том Ҳидлстон бир-бири билан келишолмайдиган ака-ука Локи ва Тор ролини ўйнайди, лекин аслида актёрлар ажойиб муносабатларга эга.

2011 йилда Cоllider’га берган интервьюсида Ҳемсворт экрандан ташқарида қадрдон дўстлиги туфайли Ҳиддлстон билан ишлаш доим осон эканини айтади.

Лина Ҳиди ва Питер Динклейж

“Тахтлар ўйини”да Серсей Ланнистер укаси Тириондан шунчалик нафратланадики, бошқа қаҳрамонга нисбатан бундай нафратни ҳис қилган одамни топиш қийин бўларди. У Тирионни туғуруқ пайтида вафот этган онасининг ўлимида айблайди.

Сериалда опа-ука бир-бирини ўлдиришга ҳаракат қилса-да, аслида актёрлар Лина Ҳиди ва Питер Динклейж яқин дўст. Актриса лойиҳага Питер туфайли келган, у продюсерларни Серсей ролига Лина идеал номзод эканлигига ишонтирган. 

Леонардо Ди Каприо ва Том Ҳарди

“Омон қолган” фильмида Леонардо Ди Каприо ва Том Ҳардининг қаҳрамонлари ашаддий душман. Дарвоқе, айнан Лео “Ибтидо” фильмида иштирок этган Томни фильмда Хьюга хиёнат қилган Жон ролини ўйнашга кўндирган. Ҳарди одатда бошқа лойиҳада банд бўлса, унга таклиф қилинган фильмларнинг сценарийларини ўқимаган ҳам, аммо Ди Каприонинг мазкур таклифини эътиборсиз қолдира олмаган.