Голливуд юлдузи бўлишнинг ўзига яраша қийинчиликлари кўп, масалан, машҳур инсонлар ҳаётидаги барча тафсилотларни доим ҳам яшира олмайди. Аммо гап фарзанд ҳақида кетганда, баъзи ота-оналар меросхўрларининг шахсий дахлсизлигини бор кучи билан ҳимоя қилади ва уларни матбуот ва мухлислар эътиборидан узоқроқ бўлишини таъминлайди.
Элайжа Вуд
“Узуклар ҳукмдори” фильми юлдузининг фарзандлари борлигидан кўпчилик мухлислари бехабар бўлса керак, чунки актёр шахсий ҳаёти ҳақида деярли ҳеч қандай маълумот билан бўлишмайди. Фақат 2023 йилда The Wall Street Journal’га берган интервьюсида у иккинчи фарзанди борлигини айтиб ўтган.
“Оиламизда 3 ёшли ўғлимиз ва 14 ойлик қизимиз бор. Қизим бизни эрта тонгдан уйғотади”, дейди Элайжа. У аёли Метте-Мари Конгсвед билан узоқ йиллардан бери бирга яшаб келмоқда.
Скарлетт Йоханссон
Marvel олами юлдузи шахсий ҳаёти ҳақидаги тафсилотларни доим сир сақлаб келган. Унинг иккинчи турмуш ўртоғи Ромен Дориакдан Роуз исмли 10 яшар қизи бор (биринчи турмуши — Райан Рейнолдсдан актрисанинг фарзандлари йўқ). 2022 йилда Скарлетт ва унинг учинчи эри, Saturday Night Live сценаристи ва актёр Колин Жостдан иккинчи фарзанди туғилди, унга Космо исми қўйилди.
Йоханссон Vanity Fair нашрига берган интервьюсида “Ҳомиладорлик даврида мен жамоатчилик эътиборига тушишни ва танамдаги ўзгаришлар ҳақида ижобий ёки салбий фикрлар ёзишларини истамадим”, — дейди Йоханссон.
Александр Скарсгард
“Ҳақиқий қон” юлдузи бир неча йиллардан бери швед актрисаси Тува Новотни билан бирга яшайди, лекин ўзининг шахсий ҳаёти ҳақида ҳеч қандай тафсилотларни ошкор қилмайди.
2022 йилда эр-хотин Нью Йоркда янги туғилган чақалоқ билан кўриниш берди. Орадан беш ой ўтгач, “Меросхўрлар” фильми тўртинчи мавсуми премьерасида Александр ота бўлганини тасдиқлади ва ўзининг махфийлик қадриятларига амал қилган ҳолда чақалоқ қачон туғилганини ва унинг исми нима эканлигини айтмади.
Натали Дормер
“Тахтлар ўйини” юлдузи ўзи ва унинг турмуш ўртоғи, актёр Девид Оукс пандемия даврида фарзанд кўришга қарор қилганини айтган эди. Натали ҳазиломуз тарзда: “Одамлар бу даврда яна нималар билан машғул бўлиши мумкин?” деган эди.
Дормернинг айтишича, карантин туфайли у ҳомиладорлиги ва фарзандли бўлганини узоқ вақт сир сақлашга муваффақ бўлган.
Эмми Россам
Эмми Россам ва унинг турмуш ўртоғи — мода режиссёри, сценарийнавис ва продюсер Сем Эсмейл ҳам оиласига янги меҳмон келиши ҳақида ҳеч кимга маълумот бермаган.
Эр-хотиннинг биринчи фарзанди 2021 йилда туғилгани Эммининг ижтимоий тармоқлардаги пости туфайли маълум бўлган.
Майкл Сера
Канадалик актёр ва мусиқачи Майкл Сера ҳам ОАВга шахсий ҳаёти ҳақида ҳеч қандай маълумот бермаслиги билан ажралиб туради. Унинг дўсти Эми Шумер “Ҳаёт ва Бет” сериалининг премьераси доирасида Entertainment Tonight нашрига берган интервьюсида актёр ота бўлганини тасодифан айтиб юборган.
Шумер 2 ёшли ўғли ҳақида гапириб, Майклнинг ҳам фарзанди борлигини маълум қилган. Сера мазкур янгиликни тасдиқлаган, аммо ҳеч қандай тафсилотлар билан бўлишмаган.
Изоҳ (0)