Актёрлар ҳам биз каби оддий инсонлар. Касбининг бир қатор молиявий афзалликлари, томошабинлар ёдида қолган ажойиб ролларига қарамай, лойиҳа шунчаки бизнес келишув натижаси бўлиши табиий. Қуйида фильм сценарийси ёқмаса ҳам, фақат яхши гонорар олиш учун суратга тушган актёрлар рўйхати билан танишамиз.
Хью Грант — “Вонка”
“Вонка” фильмида актёр Хью Грант митти қаҳрамонлар — умпа-лумпа образида намоён бўлади ва қўшиқ куйлайди. Суратга олиш жараёни ҳақида гапирар экан, унинг персонажини жуда кичик қилиш учун режиссёрлар кўплаб жиҳозлардан фойдалангани учун жуда кўп ноқулайликларни бошдан кечирганини айтиб берди. Актёр тан олишича, у ижро этган қаҳрамон танасини профессионал аниматор ёрдамида алоҳида суратга олишга мажбур бўлишган.
“Мен ушбу образни ёқтирмас эдим, аммо оилам ва фарзандларимни боқиш учун менга пул зарур”, — деди Жекман.
Рейчел Зеглер — “Шазам! Худолар ғазаби”
“Вестсайд ҳикояси” премьерасидан сўнг актриса Рейчел Зеглер Голливудда шуҳрат қозонди ва “Олтин Глобус” мукофотини қўлга киритди. Аммо COVID-19 пандемияси даврида уни актриса сифатида ҳеч ким танимас эди ва унга таклиф қилинган барча ролларга пул ва тезроқ машҳурликка эришиш учун рози бўлар эди. Актриса “Шазам! Худолар ғазаби” кастингига ҳам фақат даромад олиш мақсадида борган.
Стивен Диллейн — “Тахтлар ўйини”
Кўпчилик “Тахтлар ўйини” каби кенг кўламли лойиҳаларда иштирок этишни орзу қилган бўлса-да, Стивен Диллейн фентези сериалда рол ижро этишни умуман истамаганини тан олади. У ўз қаҳрамонини ёқтирмас ва бунинг устига, сериал сюжетида нималар бўлаётганини яхши тушунмас эди. Актёр ролга молиявий фойда кўриш учунгина рози бўлган.
Жеки Чан — “Тиғиз вақт”
Жеки Чан кўпгина фильмларидаги образни катта меҳр ва эътибор билан яратади. Аммо актёр “Тиғиз вақт”даги қаҳрамонини ёқтирмас эди. Унинг сўзларига кўра, Чан режиссёр ва сценарий муаллифларига ҳеч қачон ортиқча саволлар ва таклифлар бермаган — агар улар яхши ҳақ таклиф қилишса, албатта, ўзига ёқмайдиган ролларни ҳам ижро этаверади.
Лоуренс Оливье — “Инчхон”
Кинодаги фаолиятининг сўнгги йилларида машҳур актёр Лоуренс Оливье Кореядаги уруш ҳақидаги фильмда суратга тушди. У нима учун бундай рол ижро этишга рози бўлганини сўрашганда актёр шундай жавоб берди:
“Боиси жуда оддий — мен худди парланиб кетаётган эски винога ўхшайман ва охирим яқинлашаётганини ҳис қиляпман. Менинг ортимдан оиламга пулдан бошқа ҳеч нарса қолмайди. Яхши маош таклиф этишгани учун ролга рози бўлишни пасткашлик деб ҳисобламайман”.
Морган Фриман — “Лондоннинг қулаши”
Таниқли актёр Морган Фриманнинг сўзларига кўра, унга Голливуднинг йирик студиясидан фильмда суратга тушиш таклифи тушса, ҳеч иккиланмасдан уни қабул қилади. Чунки фильм қандай бўлишидан қатъи назар, йирик киностудиялар ҳар доим жуда яхши ҳақ тўлайди.
Дэннис Хоппер — “Ака-ука супер Мариолар”
Дэннис Хоппернинг айтишича, у “Ака-ука супер Мариолар” фильмида фақат пул учун суратга тушган, фильмнинг сюжети актёрга умуман ёқмаган. Унинг олти ёшли ўғли отасидан нега бундай аҳмоқона фильмда рол ўйнаганини сўраганида, у ўғлига жавобан: “Сенга янги пойабзал сотиб олиш учун”, деган.
Бред Питт — “Вампир билан интервью”
Голливуд юлдузи Бред Питт “Вампир билан интервью” фильмини суратга олиш жараёнини жуда ёмон кўрган. Актёрга ҳар куни қоронғи студияда суратга тушиш кераклиги салбий таъсир кўрсатган. Бир куни у продюсерга қўнғироқ қилиб, суратга тушишдан бош тортиш ва шартномани бекор қилиш қанчага тушишини сўраган. Жавоб эса “40 миллион доллар” эди. Бундай катта йўқотиш бу актёрни фильмга қайтариб қолган.
Изоҳ (0)