Қозоғистон нефть қазиб олишни йилига 100 миллион тоннага етказмоқчи. Бу ҳақда мамлакат президенти Қосим-Жўмарт Тўқаев Остонада бўлиб ўтган Хорижий инвесторлар кенгаши йиғилишида маълум қилди.
“Халқаро нефть компаниялари мамлакат тараққиётида асосий рол ўйнади. Уларнинг Қозоғистонда мавжудлиги сармоявий жозибадорлик белгисидир. Инвестициялар энергетика саноатининг ўсишига туртки бўлди, сўнгги 30 йил ичида нефть қазиб олиш уч баравар ошди. Бу ютуқ Қозоғистонга нефть қазиб олиш ўсиш суръатлари юқори бўлган етакчи бешликка кириш имконини берди. Келгусида йилига 100 миллион тонна меъёрдан ўтишга интиламиз”, дейди Тўқаев.
Президент мамлакатдаги газ ва нефть-кимё саноатининг ривожланиши ҳақида ҳам тўхталиб ўтган.
“Янги газ конларини қидиришни бошлаб, Chevron компанияси билан ҳамкорликдаги фаолиятимизни кенгайтирдик. Нефть-кимё саноатининг ривожланиши Қозоғистон иқтисодиёти учун ҳам ҳал қилувчи аҳамиятга эга. 2022 йилда йилига 500 минг тонна қувватга эга Марказий Осиёдаги энг йирик полипропилен ишлаб чиқарувчи заводни ишга туширдик”, дея қўшимча қилган Қозоғистон етакчиси.
Тўқаевнинг қайд этишича, айни пайтда мазкур корхона ички талабнинг қарийб 60 фоизини қондириб, маҳсулотларини Европа, Туркия ва Хитойга экспорт қилмоқда. Жорий йилнинг сентябрь ойида мамлакат йилига 102 миллион тонна полиэтилен ишлаб чиқариш қувватига эга завод қурилишини бошлаган.
Унинг сўзларига кўра, айни пайтда нефть-кимё соҳасида умумий қиймати 14 миллиард доллар бўлган қатор лойиҳалар, хусусан, бутадиeн, телофил кислота, карбамид ишлаб чиқариш кўриб чиқилмоқда.
Изоҳ (0)