Қозоғистонда Яқин Шарқдаги вазият барқарорлашгунга қадар Исроилга нефть экспортини тўхтатиб туришни талаб қилувчи петиция бошланди. Бу ҳақда Оrdа хабар берди.
Икки кун ичида петицияга 10 мингдан ортиқ одам имзо чеккан. Ҳужжат муаллифи Қозоғистон Яқин Шарқ минтақасида тинчлик ва барқарорликни ўрнатишга ҳисса қўшадиган дипломатик ечимларни излашда фаол иштирок этиши керак, деб ҳисоблайди.
“Мамлакатимиз доимо халқаро майдонда тинчлик ва барқарорлик тарафдори бўлиб келган. Можаролар давом этаётган минтақаларга нефть каби стратегик аҳамиятга эга ресурсларни экспорт қилиш томонлардан бирини қўллаб-қувватлаш сифатида қабул қилиниши мумкин.
Кўпчиликнинг чақириқларига қарамай, Исроил Ғазодаги ҳарбий амалиётларини давом эттирмоқда. Бундан ташқари, Исроил БМТ Бош ассамблеясининг зудлик билан сулҳ тузишга чақирувчи резолюциясини рад этди”, — дейди Ерм Султон.
Шунингдек, петиция муаллифи унинг илтимосномаси қонун доирасида бўлгани каби холис нуқтаи назардан ҳам кўриб чиқилишини сўраган.
13 октябрь куни президент Қосим-Жўмарт Тўқаев Қозоғистон ҳар қандай халқаро муаммоларни ҳал қилишда террорчилик усулларидан фойдаланишга қарши эканини айтган.
“Ўнлаб йиллар давомида ҳал этилмаган вазифаларни амалга ошириш учун тинч аҳолига нисбатан зўравонлик, террорчилик ҳаракатларига қўл уриш керак эмас. Буни ҳеч қандай тарзда оқлаб бўлмайди”, — деди Тўқаев.
У республика халқаро муносабатларда адолат тамойилини қарор топтириш, уларни халқаро ҳамжамиятнинг барча аъзоларининг ҳуқуқий ва суверен ҳуқуқларини ҳисобга олган ҳолда демократлаштириш тарафдори эканини таъкидлади.
- S&P Global Commodity Insights маълумотларига кўра, 2023 йилда Исроил нефтни асосан Туркия, Россия ва Габондан олган. Хом нефть импорти кунига қарийб 300 минг баррелни, нефть маҳсулотлари 50 минг баррелни ташкил этган.
- Бир йил аввал нефтнинг асосий етказиб берувчилари Ироқ, Озарбайжон ва Қозоғистон, шунингдек, кичик ҳажмларда — Нигерия, Габон ва Бразилия бўлган.
Изоҳ (0)