Қозоғистонда Туркиянинг машҳур Bayraktar ҳарбий дронини маҳаллий ишлаб чиқариш йўлга қўйилиши мумкин. Мудофаа вазири Руслан Жаксиликов Baykar Defence компанияси бош директори Ҳалук Байрактар билан музокаралар ўтказди.
Қозоғистон мудофаа вазирининг Туркияга ташрифи икки мамлакат ўртасидаги ҳарбий-техник ҳамкорликни ривожлантириш доирасида амалга оширилмоқда. Жаксиликов бошчилигидаги Қозоғистон делегацияси SAHA EXPO-2024 мудофаа ва аэрокосмик саноатининг IV халқаро кўргазмасининг очилишида иштирок этган.
Кўргазмада энг сўнгги мудофаа технологиялари намойиш этилди: қўшинларни автоматик бошқариш тизимлари, робототехника мажмуалари, алоқа тизимлари, ҳаво мудофааси, радиоразведка ва радиоэлектрон кураш воситалари. Учувчисиз учиш аппаратлари, юқори аниқликдаги қуроллар ва илғор лазер технологиялари алоҳида эътиборни тортди, дейилади вазирлик хабарида.
Кўргазма доирасида Жаксиликов бир қатор муҳим музокаралар ўтказган. Учрашувлар Туркия миллий мудофаа вазири Яшар Гулер, Туркия Мудофаа саноати агентлиги раиси Ҳалук Горгун ва БАА бош вазири ўринбосари, мудофаа вазири Муҳаммад бин Рошид Ал-Мактум билан бўлиб ўтган.
Baykar Defence компанияси бош директори Ҳалук Байрактар билан ўтказилган музокаралар алоҳида ва муҳим воқеа бўлди. Томонлар мамлакатимиз ҳудудида тактик учувчисиз авиация тизимлари ва оператив даражадаги ўқ-дориларни ишлаб чиқаришни маҳаллийлаштириш бўйича йўл харитасини тайёрлаш тўғрисида келишувга эришди, дейди Мудофаа вазирлиги.
Изоҳ (0)