Қозоғистон ҳозирча BRICS’га қўшилиш учун ариза бермайди, бироқ мамлакат президенти Қосим-Жўмарт Тўқаев Қозонда бўлиб ўтадиган ташкилот саммитида иштирок этади.
Президент маслаҳатчиси ҳамда матбуот котиби Берик Уалининг маълум қилишича, Қозоғистон универсал халқаро ташкилот сифатида БМТга устунлик беради.
Уали Қозоғистон президентига мамлакатнинг BRICS’га қўшилиши бўйича таклифлар тушгани ва уларнинг ҳар бири кўриб чиқилганини айтган. У блокка қўшилишдан бош тортишига сабаб сифатида аъзолик масаласини кўриб чиқишнинг кўп босқичли жараёнини, шунингдек, “ушбу ассоциациянинг ривожланиш истиқболлари билан боғлиқ бошқа масалаларни” таъкидлаган.
Президент маслаҳатчиси BRICS саммитида иштирок этиш Тўқаевнинг жадвалидан жой олганини қўшимча қилган. Унга кўра, Қозоғистон етакчиси 24 октябрь куни ташкилотнинг кенгайтирилган йиғилишида нутқ сўзламоқчи.
“Президент БМТни универсал ва баҳссиз ташкилот сифатида бир неча бор таъкидлаган, унда барча долзарб халқаро муаммолар, жумладан адолатли дунё тартибини барпо этиш билан боғлиқ масалалар муҳокама қилиниши мумкин”, дейди маслаҳатчи.
Қозондаги BRICS саммити уч кун, 22—24 октябрь кунлари ўтказилиши ҳамда унда 30 дан ортиқ давлат иштирок этиши кутилмоқда. Жорий йилда Малайзия ва Озарбайжон ташкилотга аъзо бўлиш учун расмий аризаларни топширган. Bloomberg’га кўра, Туркия ҳам ариза топширган, бироқ Анқара буни ҳали расман тасдиқламаган. Буркина Фасо ва Шри Ланка ҳам BRICS’га кириш истагини билдирган.
Изоҳ (0)