Тўқаев яна Россия ҳарбий жиҳатдан енгилмаслигини таъкидлади

Қозоғистон президенти Astana Think Tank Forum ялпи мажлисида сўзга чиқиб, яна Россия ва Украина ўртасидаги уруш ҳақида фикр билдирди. Бу ҳақда “КазТаг” хабар берди.

“Канцлер Шольц билан музокаралар давомида айтганимдек, Россия ҳарбий жиҳатдан енгилмасдир. Бу Россиянинг ҳарбий салоҳияти, мамлакат аҳолисининг президент Путин сиёсатини қўллаб-қувватлаши ва тарихнинг ўзи билан тасдиқланадиган фактдир.

Шу сабабли, биз тинч йўл билан ҳал этиш вариантларини излашни зарур деб ҳисоблаймиз ва барча давлатларнинг, жумладан, Хитой ва Бразилиянинг ҳам реал режаларини қўллаб-қувватлаймиз. Бошқа йўл йўқ. Муқобил вариант — бу ўзаро қирғин урушидир. Эҳтимол, баъзи жаҳон кучлари бундан манфаатдордир, аммо бу тубсизликка олиб борадиган йўлдир. Конструктив музокаралар орқали тинчликка интилиш заифлик белгиси эмас, балки стратегик донишмандликнинг намоён бўлишидир”, деди у.

Тўқаев сентябрь ойи ўрталарида Германия канцлери Шольц билан учрашувда Россияни енгилмас деб атаганди. Шу билан бирга, Қозоғистон президенти Хитой ва Бразилиянинг Россия—Украина урушини ҳал қилиш режасини эслатиб ўтган. Бироқ Зеленский бу режани деструктив деб атаган ва уни муҳокама қилишдан бош тортган.