UFC’нинг икки вазн тоифасидаги собиқ чемпиони — ярим енгил (66 кг) ва енгил (70 кг) вазн тоифаларида ғолиб бўлган ирландиялик Конор Макгрегор промоушен жангчилари рўйхатидан чиқарилгани ҳақидаги хабарлар рад этилди.
Аввалроқ UFC Roster Watch ўзининг Х (собиқ Twitter) саҳифаси орқали Макгрегорнинг UFC рўйхатидан ўчирилгани ҳақида хабар берган эди. Бироқ ташкилот президенти Дана Уайт бу даъволарни “тўлиқ бўҳтон” деб атади.
37 ёшли Макгрегор 31 июль куни допингга қарши қайта тест топширганини маълум қилган эди. Шунингдек, у 2026 йилда АҚШ Мустақиллик декларацияси имзоланганининг 250 йиллиги муносабати билан Оқ уйда ўтказилиши режалаштирилаётган UFC оқшомида қатнашишга тайёрлигини билдирган.
Президент Трампнинг Оқ уйда UFC жанги ўтказиш қарори мени ҳайратга солди. Бу мен учун улкан шараф бўларди. Менга ишонишингиз мумкин, — дея таъкидлаган Конор Макгрегор.
Маълумот учун, Макгрегор сўнгги бор 2021 йил июль ойида бўлиб ўтган UFC 264 турнирида октагонга чиқиб, америкалик собиқ вақтинчалик чемпион Дастин Порьега биринчи раундда техник нокаут (оёқ жароҳати) эвазига мағлуб бўлган эди. У профессионал фаолияти давомида жами 28 та жанг ўтказиб, 22 та ғалаба ва 6 та мағлубият қайд этган.
Изоҳ (0)