Россия президенти Владимир Путин ва Қозоғистон президенти Қосим-Жўмарт Тўқаев телефон орқали суҳбатлашди. Улар икки мамлакат ўртасидаги шерикликни, шу жумладан, энергетика соҳасидаги ҳамкорликни ривожлантиришни муҳокама қилди.
«Владимир Путиннинг Қосим-Жўмарт Тўқаев билан телефон орқали мулоқоти чоғида Россия-Қозоғистон стратегик шериклиги ва иттифоқини ривожлантириш бўйича долзарб мавзулар муҳокама қилинди», — дейилади Кремль сайтида эълон қилинган хабарда.
Қозоғистон президенти матбуот хизмати маълум қилишича, томонлар иқтисодиёт, энергетика ва бошқа бир қатор соҳалардаги алоқаларни ривожлантиришни муҳокама қилган.
Сўнгги марта Путин ва Тўқаевнинг мулоқоти ҳақида 3 январь куни расман хабар берилганди. Икки мамлакат етакчилари бир-бирини Янги йил билан табриклаган. 28 ноябрь куни эса Кремлда улар музокаралар ўтказганди. Ўшанда томонлар бошқа масалалар билан бир қаторда, Россия, Қозоғистон ва Ўзбекистон ўртасида «уч томонлама газ иттифоқи»ни яратишни муҳокама қилган.
2022 йил июнида QazaqGaz ва «Газпром» Қозоғистондан Россияга газ қайта ишлаб юбориш ҳажмини ошириш ҳақида шартнома имзолаганди. 30 декабрь куни эса Россия Қозоғистон билан Россия нефтини Хитойга транзит қилиш тўғрисидаги битим муддатини узайтирди. Ҳужжат 2034 йил 1 январгача амал қилади. Шунингдек, Россия Қозоғистонга ўз қувурлари орқали Германияга нефть етказиб бериш учун рухсат берди.
Мавзуга доир:
Изоҳ (0)